මිනිසා මිනිසාගෙන් වෙනස් වී පෙනෙන විවිධත්වයෙන් යුත් පැතිකඩක් වන පෞරුෂය මිනිසාගේ චර්යාව සහ චින්තනය තීරණය කරන ඔහුගේ හෝ ඇයගේ මනෝභෞතික පද්ධතීන්ගේ ගතික සංවිධානයකි. එය මිනිසාගේ අනන්‍යතාවය සහ සමස්ත මනෝවිද්‍යාත්මක රටා තීරණය කරන අද්විතීය ලක්ෂණ ඒකාබද්ධ කරන සංවිධානාත්මක හැසිරීමකි. මිනිසාගේ ප්‍රජානන , අභිප්‍රේරණය , චර්යාවන් කෙරෙහි විශාල බලපෑමක් සිදුකරලන පෞරුෂත්වය ගොඩනැංවීම කෙරෙහි විවිධ හේතූ සාධකයන් බලපානු ලබයි. ඒ අතුරින් කෙවින් ලේමාන් (Kevin Leman) උපත් අනුපිළිවෙළ (Birth Order- 1982) නම් ග්‍රන්ථය මඟින් මිනිසාගේ උපත් අනුපිළිවෙළ අනුව පෞරුෂ වර්ග 04 ක් පිළිබඳ සඳහන් කර ඇත.
1.පළමුව උපන් ළමයා (First Born Child)
2.දෙවනියට උපන් ළමයා (Middle Child)
3. බාල ළමයා (Last Born Child)
4. එකම ළමයා ( Only Child )
පළමුව උපන් ළමයා (First Born Child)
දෙමාපියගේ වැඩිම අවධානයට ලක්වන මෙම දරුවන් පවුලේ වැඩිමහල් දරුවා නිසාවෙන් කුඩා වැඩිහිටියන් ලෙසට හැසිරේ. ඔවුන් බොහෝ දුරට නායකයන් වන බවට ලේමන් පවසයි. කාර්යක්ෂම වන මොවුන් සිදුකරන සෑම දෙයක් ම ඉතා හොඳින් සිදුකරයි. වැඩිහිටියන්ගේ හිත් දිනා ගැනීමට සමත්කම් දක්වන අතර වැරදි පියවර ගැනීමට බිය වේ.ප්‍රවේශම්සහගත ය. පරීක්ෂාකාරී ය. හෘදසාක්ෂියට අනුව කටයුතු කරයි. ඉලක්ක තැබීමට ප්‍රිය කරයි.
දෙවනියට උපන් ළමයා (Middle Child)
දෙමාපියන් විසින් වැඩිමහල් සහෝදරයාට හෝ බාල සහෝදරයාට විශේෂත්වයක් කරමින් තමන් ව නොසලකා හරිනු ඇතැයි යන හැඟීමක් ඇතිවේ. එබැවින් මොවුන් තරමක් කැරලිකාර , ගුප්ත ආකාරයේ පෞරුෂයක් හිමි වේ. ඔහු හෝ ඇය සාමය ඇති කරන්නෙකි. විශේෂයෙන් ම වැඩිමහල් සහෝදරයාට හා බාල සහෝදරයා අතර සාමය ගෙනෙන සාම දූතයා ය. මිනිසුන් සතුටු කිරීමට උත්සුක වන්නෙකි. මිත්‍ර සබඳතාවල දී ඉතා ශක්තිමත් ය. සමාජීය වශයෙන් කටයුතු කරයි. අවංක හා ඉතා හොඳ සවන්දෙන්නෙක් ය.
බාල ළමයා (Last Born Child)
පවුලේ බාලම තැනැත්තා නිසාවෙන් දෙමාපියන්ගේ ලිහිල් බව නිසාවෙන් ඔහු හෝ ඇය නිදහස් මානසිකත්වයකින් යුක්ත ය. විනෝදකාමී ය. තමන්ගේ වාසියට කටයුතු කරන ආත්මාර්ථකාමී ගතිලක්ෂණ ඇත. සමාජශිලී හා මිත්‍රශීලී ඔවුන් මූල්‍යමය වශයෙන් වගකීම් විරහිත ය. අවධානය සොයන්නෙකි.
එකම ළමයා ( Only Child )
පවුලේ එකම ළමයා නිසාවෙන් ඒකාධිකාරීත්වයක් රඳවා ගැනීමට උත්සුක වේ. කිසිඳු තරඟකාරීත්වක් නොමැති නිසා දෙමාපියන්ගේ අවධානය සම්බන්ධයෙන් ඒකාධිකාරීත්වය ද දරයි. නායකයන් බවට පත් වේ. කාර්යක්ෂම ය. හෘදසාක්ෂියට අනුව කටයුතු කරයි. වගකීම් සහගත ය. පරිපූර්ණතාවාදියෙකි.
කෙසේ වෙතත් ලේමාන්ගේ උපත් අනුපිළිවෙළ පමණක් නොව ඔවුන්ගේ හැසිරීමට බලපෑම් කළ හැකි විචල්‍යයන් ගණනාවක් දක්නට ඇත්තේ ය.
උෂාරා කළුදුර .
