රජය විසින් භාණ්ඩ මිල අඩුවූ බවට ප‍්‍රකාශ කළද වෙළදපොළේ එළවළු හැරෙන්නට වෙනත් කිසිදු භාණ්ඩයක මිල තවමත් අඩුවී නොමැති බවට පාරිභෝගිකයින් චෝදනා කරනවා.
මේ අතර වැඩිමිලට භාණ්ඩ අලෙවිකරන පුද්ගලයින් සොයා පාරිභෝගික කටයුතු පිළිබඳ අධිකාරිය විසින් වැටලීම් ක‍්‍රියාත්මක කර ඇති අතර ඒ අනුව අද කොළඹ සුපිරි වෙළඳසැල් 05 ක් ඇතුළු තවත් වෙළඳසැල් 15 කට නීතිමය පියවර ගැනුණා.
මීට අමතරව දිවයින පුරා සිදු කළ වැටලීම් වලීන් ව්‍යාපාරිකයින් 1,500කට ආසන්න ප‍්‍රමාණයකට නීතිමය පියවර ගැනීමට ද පාරිභෝගික කටයුතු පිළිබඳ අධිකාරිය පියවර ගෙන තිබෙනවා.
සිංහල හා දෙමළ අලූත් අවුරුද්ද උදාවීමට ඇත්තේ තවත් දින 05 ක පමණ කාලයක්. එබැවින් ජනතාව සිය අවශ්‍යතාවයන් ඉෂ්ඨකර ගැනීම සඳහා නගරය වෙත වැඩි වශයෙන් පැමිණෙන අතර ඔවුන්ට අවශ්‍ය අනෙකුත් පහසුකම් සළසා දීම සඳහා රජය මේ වන විට විශේෂ වැඩපිළිවෙලක් ක‍්‍රියාත්මක කර තිබෙනවා.
ඒ අනුවයි පාරිභෝගික ජනතාව රවටා වැඩිමිලට භාණ්ඩ අලෙවිකරන පුද්ගලයින් සොයා වැටලීම් ක‍්‍රියාත්මක කර ඇත්තේ. එසේම නිසි පරිදි පාරිභෝගික් නීති ආරක්ෂා නොකර වෙළඳසැල් අද පරික්ෂා කෙරුණා.
එමෙන්ම උත්සව කාල සීමාවත් සමඟ වෙළඳපළේ ප‍්‍රමිතියෙන් තොර කිරුම් මිනුම් උපකරණ පිළිබඳව දැනුම් දීම සඳහා පැය 24 පුරා ක‍්‍රියාත්මක විශේෂිත දුරකථන අංකයක් හදුන්වා දී තිබෙනවා. ඒ පාරිභෝගික ජනතාව මුලාවට පත්කරමින් ප‍්‍රමිතියෙන් තොර තරාදි වැනි කිරුම් මිනුම් උපකරණ භාවිතකරන බවට ලද පැමිණිලි අනුවයි.
ඒ අනුව 011 218 22 53 යන අංකයට අමතා එම උපකරණ සම්බන්ධයෙන් තොරතුරු ලබාදීමේ හැකියාව පවතින බවයි මිනුම් ඒකක ප‍්‍රමිති හා සේවා දෙපාර්තමේන්තුව සඳහන් කළේ.
