පසුගිය වසරේ මැයි 09 වනදා රට තුළ ඇතිවූ කලහකාරි තත්වයේදී නිට්ටඹුව නගර මධ්‍යයේ ඝාතනයට ලක්වූ ශ‍්‍රී ලංකා පොදුජන පෙරමුණේ පොළොන්නරුව දිස්ත‍්‍රික් පාර්ලිමේන්තු මන්ත්රී අමරකීර්ති අතුකෝරල සිහිකරමින් විශේෂ අනුස්මරණ වැඩසටහනක් පාර්ලිමේන්තුවේදී අද පස්වරුවේදී පැවැත්වුණා.
එමෙන්ම මෙම සිද්ධිය සම්බන්ධයෙන් ශෝකය ප‍්‍රකාශ කරමින් විනාඩියක නිශ්ශබ්දතාවක් ද පාර්ලිමේන්තුවේදී අද පෙරවරුවේ පවත්වනු ලැබුවේ පාර්ලිමේන්තු මන්ත්රී නිමල් ලංසා කළ ඉල්ලීමකට අනුවයි.
මේ අතර අරගලයට වර්ෂයක් සැපිරීම නිමිත්තෙන් සංවිධාන කර තිබූ උද්ඝෝෂණයකට අදාළව ජනාධිපති මන්දිරය ඇතුළු ආයතන කිහිපයකට ඇතුළුවීම තහනම් කරමින් කොළඹ කොටුව මහේස්ත‍්‍රාත් තිළිණ ගමගේ අද නියෝගයක් නිකුත් කර තිබුණා. ඒ කොළඹ කොටුව සහ කොල්ලූපිටිය පොලිස් ස්ථාන කළ ඉල්ලීමක් සළකා බලමින්.
ඒ අනුව අරගලයේ ක‍්‍රියාකාරි සාමාජිකයෙකු වන නූර් මොහොමඩ් ඇතුළු දෙදෙනෙකුට මෙම නියෝගය නිකුත් කළ අතර ජනාධිපති කාර්යාලය, අරලියගහ මන්දිරය, මුදල් අමාත්‍යංශයට ඇතුළුවීමද තහනම් කළ මහේස්ත‍්‍රාත්වරයා ජනාධිපති කාර්යාලය අසළ පිහිටි වටරවුමේ සිට ගාලූමුවදොර වටරවුම දක්වා උද්ඝෝෂණකරුවන්ට ප‍්‍රධාන මාර්ගවල ගමන් කිරීමද තහනම් කරනු ලැබුවා.
මේ අතර පසුගිය වසරේ මැයි 09 වනදා සිදුවූ කළහකාරී සිද්ධීන් සම්බන්ධයෙන් සොයාබැලීමට පූර්ණ බලතල සහිත ජනාධිපති කොමිසමක් පත් කරන ලෙස අමාත්‍ය මණ්ඩලය ජනාධිපතිවරයාගෙන් ඉල්ලීමක් කර තිබෙනවා.
අද පැවති කැබිනට් තීරණ දැනුම්දීමේ මාධ්‍ය හමුවට එක්වෙමින් කැබිනට් ප‍්‍රකාශක අමාත්‍ය බන්දුල ගුණවර්ධන මේ බව කියා සිටියා.
මේ අතර ගෝල්ෆේස් අරගල ක‍්‍රියාකාරීන් පිරිසක් අද කොළඹදී මාධ්‍ය හමුවක් කැඳවා තිබූ අතර, එහිදී අදහස් දැක්වූ ජීවන්ත පීරිස් පියතුමන් සඳහන් කළේ ප‍්‍රජාතන්ත‍්‍රවාදය හකුළා දමමින් රජය කටයුතු කරමින් සිටින බවයි.
