ආගමික සංහිදියාවට බාධා එල්ල වන ආකාරයේ ප‍්‍රකාශයක් සිදුකළ බවට චෝදනා එල්ල වී සිටින දේවගැති ජෙරොම් ප‍්‍රනාන්දු දිවයිනට පැමිණි පසු ගුවන් තොටුපලේදී අත්අඩංගුවට ගැනීමේ හැකියාව පවතින බව පොලිස් මාධ්‍ය ප‍්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව සඳහන් කළා.
මේ අතර දේවගැති ජෙරොම් ප‍්‍රනාන්දු සිය ඉන්ස්ටර්ග‍්‍රෑම් ගිනුමේ සටහනක් තබමින් ප‍්‍රකාශ කර ඇත්තේ තමන් එළැඹෙන ඉරිදා දින යළිත් දිවයිනට පැමිණෙන බවයි.
ඔහු විසින් බුදුන්වහන්සේට සහ අනෙකුත් ආගමික විශ්වාසයන්ට නිගරුවන අයුරින් කරන ලද ප‍්‍රකාශයක් සම්බන්ධයෙන් සමාජ මාධ්‍ය ඔස්සේ සංසරණය වීමත් සමඟ ඒ පිළිබඳව දැඩි කතාබහට ලක්ව තිබෙනවා.
එවන් පසුබිමක ඔහුගේ මෙම ප‍්‍රකාශ පිළිබඳ විවිධ සංවිධාන සහ පුද්ගලයින් විසින් අපරාධ පරීක්ෂණ දෙපාර්තමේන්තුවට පැමිණිලි ද ගොනු කළේ විමර්ශන සිදුකරන ලෙස ඉල්ලමින්.
එමෙන්ම ජනාධිපති රනිල් වික‍්‍රමසිංහ විසින් ජනාධිපති කාර්ය මණ්ඩල ප‍්‍රධානී සාගල රත්නායකට උපදෙස් ලබාදී තිබුණේ අපරාධ පරීක්ෂණ දෙපාර්තමේන්තුවට මේ සම්බන්ධයෙන් විමර්ශනයක් සිදුකරන ලෙසට දැනුම් දෙන ලෙසයි.
ඒ අනුව අපරාධ පරීක්ෂණ දෙපාර්තමේන්තුව ඊයේ දිනයේදී ජෙරම් ප‍්‍රනාන්දු දේවගැතිවරයා සම්බන්ධයෙන් කොටුම මහේස්ත‍්‍රාත් අධිකරණයට කරුණු ඉදිරිපත් කළ අතර එහිදී අධිකරණය ඔහුට රටින් පිටවීම වළක්වාලමින් වාරණ නියෝගයක් නිකුත් කළා.
කෙසේ වෙතත් ඒ වන විට ඔහු රටින් පිටවී සිංගප්පූරුව බලා පිටත්ව ගොස් ඇති බවටයි අනාවරණ වී ඇත්තේ.
සිංගප්පූරුවේ රැඳි සිටිමින් ජෙරම් ප‍්‍රනාන්දු දේවගැතිවරයා ප‍්‍රකාශ කර ඇත්තේ තමන් ලබන ඉරිදා යළි දිවයිනට පැමිණීමට නියමිත බවයි. දේවගැති ජෙරොම් ප‍්‍රනාන්දු අවස්ථා කිහිපයකදී මෙරට දේව මෙහෙයන් පවත්වා තිබෙනවා.
ඊට සිම්බාබ්වේ දේවගැතිවරයෙකු ගෙන්වා දේශන පවත්වා ඇති අතර ඔහුට එරෙහිව රත‍්‍රං ජාවාරම් සම්බන්ධයෙන් චෝදනා පවා එල්ල වී ඇති බවයි විදෙස් මාධ්‍ය වාර්තා සඳහන් කළේ.
