මධ්‍යම කඳුකරයට ඇද හැලෙන වැසි හේතුවෙන් ඉහළ කොත්මලේ ජලාශයේ වාන්දොරටු දෙකක් තවදුරටත් විවෘත කර තැබෙන බව ජලාශ භාර ඉංජිනේරුවරයා ප‍්‍රකාශ කළා.

මේ හේතුවෙන් ජලාශයේ පහළ ප‍්‍රදේශවල කොත්මලා ඔයේ ජලය පරිහරණය කිරීමේදී අවධානයෙන් පසුවන ලෙස නුවරඑළිය දිස්ත‍්‍රික් ආපදා කළමනාකරණ මධ්‍යස්ථානය ඉල්ලීමක් කළා.

කාසල්රී සහ මවුස්සාකැලේ ජල පෝෂක ප‍්‍රදේශවලට තද වැසි ඇතිවීමත් සමඟ ලක්ෂපාන ජලාශයේ වාන් දොරටු 3 ක් ද අද අළුයම සිට විවෘත කෙරුණා.

නෝටන්බ්‍රිජ් – විමලසුරේන්ද්‍ර ජලාශයද ඊයේ සිට වාන් දැමීමට පටන් ගෙන ඇති බවයි නුවරඑළිය දිස්ත‍්‍රික් ආපදා කළමනාකරණ ඒකකයේ සහකාර අධ්‍යක්ෂ රංජිත් අලහකෝන් සඳහන් කළේ.

පවතින වර්ෂාවත් සමඟ කාසල්රී සහ මවුස්සාකැලේ ජලාශවල ජල මට්ටම පිටාර මට්ටමට ආසන්න වෙමින් පවතිනවා.

ජල මට්ටම ඉහළ යෑමත් සමඟ කැනියොන්, ලක්ෂපාන, නව ලක්ෂපාන, පොල්පිටිය සහ විමලසුරේන්ද්‍ර යන ජලවිදුලි බලාගාරවල උත්පාදනය උපරිම ධාරිතාවයෙන් සිදුවන බවයි බලාගාර භාර ඉංජිනේරුවරුන් සඳහන් කළේ.

පවතින අධික වර්ෂාවත් සමඟ කැළණි ගඟේ ජල මට්ටමද ඉහළ ගොස් ඇති බව වාර්තා වනවා.

මේ අතර, මධ්‍යම කඳුකරයට ඇද හැලෙන අධික වර්ෂාපතනය හේතුවෙන් දිඹුලපතන – මවුන්ට් වර්නන් වතු යායේ නිවාසයක් මතට අද අලූයම විශාල පස් කන්දක් කඩාවැටීමෙන් කාන්තාවක් මියගොස් තිබෙනවා.

මෙම අනතුරෙන් මියගොස් තිබුණේ 46 හැවිරිදි කාන්තාවක්.

එමෙන්ම, හැටන් – ගාමිණීපුර ප‍්‍රදේශයේ නිවසක් මතට මාර ගසක් කඩාවැටීමෙන් අඹුසැමි යුවළක් තුවාල ලබා නිවසටද බරපතල හානි සිදුව තිබෙනවා.

මේ අතර, දිවයිිනේ නිරිත දිග කොටසේ පවතින වැසි තත්වය තවදුරටත් බලාපොරොත්තු වන බව කාලගුණ විද්‍යා දෙපාර්තමේන්තුව ප‍්‍රකාශ කළා.

සබරගමුව පළාතේත්, මහනුවර සහ නුවරඑළිය දිස්ත‍්‍රික්කවලත් ඇතැම් ස්ථානවලට මිලිමීටර 100 ට වැඩි තද වැසි ඇතිවිය හැකි බවයි එම දෙපාර්තමේන්තුව නිවේදනය කළේ.

මධ්‍යම කඳුකරයේ බටහිර බෑවුම් ප‍්‍රදේශවලටත්, උතුර, උතුරුමැද සහ දකුණු පළාත්වලටත් ත‍්‍රිකුණාමලය සහ පුත්තලම දිස්ත‍්‍රික්කවලටත් පැයට කිලෝමීටර 55 ක පමණ තද සුළං ඇතිවිය හැකි බවද එම දෙපාර්තමේන්තුව පෙන්වා දෙනවා.

මේ හේතුවෙන් කඳුකර ප‍්‍රදේශවල නායයෑම් අවදානම් සහිත ප‍්‍රදේශවල සහ ගංඟා ආශ‍්‍රිත පහත්බිම්වල වෙසෙන ජනතාව අවධානයෙන් පසුවිය යුතු බවයි කාලගුණ විද්‍යා දෙපාර්තමේන්තුව ඉල්ලා සිටින්නේ.