තම මවගේ කොණ්ඩ බූලයක් ගෙළට දමාගැනීමෙන් පසු එය නිවසේ බිත්තියේ සවිකර තිබූ ඇණයක එල්ලී ගෙළ සිරවීමෙන් අට හැවිරිදි දරුවෙකු ජීවිතක්ෂයට පත්වී තිබෙනවා.

මෙලෙස මියගොස් ඇත්තේ අඟුරුවාතොට – මහබෝගොඩ ප‍්‍රදේශයේ විදුහලක හතරවන ශ්‍රේණියේ ඉගෙනුම ලබන සිසුවෙක්.

එම අවස්ථාවේ නිවසේ කිසිවෙකු සිට නොමැති අතර නිදන කාමරයේ බිත්තියේ ගසා තිබූ ඇණයක මෙලෙස දරුවා එල්ලී සිටින ආකාරය වැඩ නිමකර නිවසට පැමිණි  ඔහුගේ පියා විසින් දැක තිබෙනවා.

එම අවස්ථාවේම පියා සිය දරුවා හොරණ රෝහලට රැගෙන ගොස් ඇති අතර, රෝහලට ඇතුළත් කිරීමෙන් අනතුරුවයි දරුවා මියගොස් ඇත්තේ.

මේ අතර, ආණමඩුව දිවුල්වැව ප‍්‍රදේශයේ සිව් හැවිරිදි දරුවෙකු පැහැරගෙන ගොස් අතවර කළ බවට සැකපිට 21 හැවිරිදි තරුණයෙකු අත්අඩංගුවට ගෙන තිබෙනවා.

ඊයේ පස්වරුවේ මෙම දරුවා නිවසේ තනිව සිට ඇති අතර, මව අසළ වෙළඳසැලකට ගොස් තිබෙනවා.

එම අවස්ථාවේ අදාළ සැකකරු පැමිණ දරුවා පොහොර උරයක දමා අසළ කැලෑබද ප‍්‍රදේශයකට ගෙන ගොස් ඇති බවයි වාර්තා වන්නේ.

මව නිවසට පැමිණ දරුවා සෙවූ අවස්ථාවේ ඔහු නොමැති නිසා අසල්වැසියන් සමඟ පරීක්ෂා කිරීමේදී 21 හැවිරිදි පුද්ගලයා සමඟ දරුවා අසළ කැලෑබද ප‍්‍රදේශයක සිටින ආකාරය දැක තිබෙනවා.

එම අවස්ථාවේ දරුවා කම්පනයටද පත්ව සිට ඇති අතර, අත්පා ද ගැට ගසා තිබූ බවයි පොලිසිය කියා සිටියේ.

සැකකරු ආණමඩුව පොලිසිය විසින් අත්අඩංගුවට ගෙන ඇති අතර, දරුවා අතවරයකට ලක්වී  ඇත්දැයි පරීක්ෂා කිරීම සඳහා ආණමඩුව රෝහලට ඇතුළත් කිරීමෙන් පසු කුරුණෑගල මහ රෝහල වෙත මාරුකර යවා ඇති බවයි පොලීසිය සඳහන් කළේ.