‘‘කිසිවෙක් අතහැරෙන්න දෙන්න එපා’’ තේමාව යටතේ ජනාධිපති රනිල් වික‍්‍රමසිංහගේ උපදෙස් පරිදි ආරම්භ කළ අඩු ආදායම්ලාභී පවුල් වෙත සුබසාධන ප‍්‍රතිලාභ ලබාදීමේ කඩිනම් වැඩපිලිවෙලට මේ වනවිට අයදුම්පත් ලක්ෂ 23 ක් ලැබී තිබෙනවා.

සුබසාධක ප‍්‍රතිලාභ මණ්ඩලය සඳහන් කළේ ඒ අතරින් අයදුම්පත් හයලක්ෂ 24,714 ක් මේ වනවිට පද්ධතියට ඇතුළත් කර ඇති බවයි.

දිවයින පුරා ප‍්‍රාදේශීය ලේකම් කාර්යාල 341 ක ස්ථාපිත සුබසාධක ප‍්‍රතිලාභ තොරතුරු ඒකක මගින් සියලූම අයදුම්පත් පද්ධතියට ඇතුළත් කිරීමේ කටයුතු කඩිනමින් සිදුකෙරෙන බවයි ඒ සම්බන්ධයෙන් නිවේදනයක් නිකුත් කරමින් ජනාධිපති මාධ්‍ය අංශය සඳහන් කළේ.

මෙම සමාජ සුබසාධක වැඩසටහන සඳහා පවුල් මිලියන 3.9 ක් අයදුම් කරනු ඇති බවට ඇස්තමේන්තු කර තිබෙනවා.

ඒ අනුව, මේ වනවිට සුබසාධක ප‍්‍රතිලාභ ලබන හෝ පොරොත්තු ලේඛනයේ සිටින පවුල් මිලියන 3.3 ට අමතරව, කොරෝනා දෙවන රැල්ල සහ ආර්ථික අර්බුදය හමුවේ අලූතින් අඩු ආදායම්ලාභී තත්ත්වයට පත්ව ඇති පවුල් ලක්ෂ 6ක්ද මේ සඳහා අයදුම් කරනු ඇතැයි අපේක්ෂා කෙරෙනවා.

මෙම වැඩසටහන යටතේ අඩු ආදායම්ලාභී පවුල් ලක්ෂ 39 ක් සුබසාධක ප‍්‍රතිලාභ ලැබීමට නියමිතයි.

සමෘද්ධිලාභීන්, වැඩිහිටි, ආබාධිත, වකුගඩු රෝගී ලෙස මේ වනවිටත් සුබසාධක ප‍්‍රතිලාභ ලබන්නන් මෙන්ම අලූතින් සුබසාධක ප‍්‍රතිලාභ අපේක්ෂා කරන්නන්ද මේ සඳහා ලියාපදිංචි විය යුතු බවයි ජනාධිපති මාධ්‍ය අංශය සඳහන් කළේ.

ඒ සඳහා අයදුම්පත් යොමු කිරීම මේ මස 15 වැනිදායින් අවසන් වන බවයි සුබසාධක ප‍්‍රතිලාභ මණ්ඩලය කියා සිටියේ. එසේම, දෙසැම්බර් 15 වැනිදා වනවිට සුදුසුකම් සැපිරූ අයදුම්කරුවන්ගේ නාම ලේඛනය ප‍්‍රාදේශීය ලේකම් කොට්ඨාශ මට්ටමින් ප‍්‍රසිද්ධ කිරීමට නියමිත බවද එම මණ්ඩලය පවසනවා.