අනුරාධපුර – කැබිතිගොල්ලෑව – රඹකැපූවැව ප‍්‍රදේශයේදී විරෝධතාවක් අතරතුර ප‍්‍රදේශවාසීන්ගේ පහරකෑමට ලක්ව පොලිස් සැරයන්වරයෙකු ජීවිතක්ෂයට පත්වීමේ සිද්ධියට සම්බන්ධ ප‍්‍රධාන සැකකරුද අත්අඩංගුවට ගෙන ඇති බව පොලිසිය පවසනවා.

විමර්ශන සිදුකරන පොලිස් නිලධාරියෙකු සඳහන් කළේ හිමිනමක්, කාන්තාවන් දෙදෙනෙකු ඇතුලූ 15 දෙනෙකු මේ වනවිට අත්අඩංගුවට ගෙන ඇති බවයි.

එමෙන්ම අවශ්‍ය කරන තවත් සැකකරුවෙකු ප‍්‍රදේශයෙන් පලා ගොස් ඇති බවද එම නිලධාරියා සඳහන් කළා. වීඩියෝ දර්ශන උපයෝගී කරගනිමින් තවදුරටත් විමර්ශන ක්‍රියාත්මකයි.

මේ අතර අත්අඩංගුවට ගත් 15 දෙනාගෙන් හිමිනම ඇතුලූ හතරදෙනෙකු ඊයේ කැබිතිගොල්ලෑව මහේස්ත‍්‍රාත්වරයා වෙත ඉදිරිපත් කිරීමෙන් අනතුරුව පැය 48 ක රැඳවුම් නියෝගද ලබාගෙන තිබුණා.

අත්අඩංගුවට ගත් හිමිනම කලක් යුද හමුදාවේ සේවය කළ අයෙකු බවටයි විමර්ශනවලින් අනාවරණ වී ඇත්තේ.

එමෙන්ම මියගිය පොලිස් නිලධාරියා වන අලි ගැටළුව සම්බන්ධයෙන් නිරන්තරයෙන් විමසා බැලූ නිලධාරියෙකු බවද වාර්තා වනවා.

සිද්ධියට අදාළව ප‍්‍රදේශවාසීන්ගෙන් ප‍්‍රකාශ ද මේ වනවිට සටහන් කරගෙන තිබෙනවා.

වනඅලි පහරදීමකින් පුද්ගලයෙකු මියයෑමේ සිද්ධියකට විරෝධය පළ කරමින් රඹකැපූවැව ප‍්‍රදේශවාසීන් පෙරේදා රාත්‍රියේ විරෝධතාවක නිරත වූ අතර පොලිසිය පැමිණීමත් සමඟ විරෝධතාවයේ නිරත පිරිස පොලිස් ස්ථානාධිපතිවරයා ඇතුළු පිරිසට පහර දී රාජකාරී ගිනි අවිය පැහැරගැනීමට උත්සාහ දරා ඇති බවයි පොලිසිය සඳහන් කළේ.

එහිදී පොල්ලකින් හිසට පහරදීම හේතුවෙන් 54 හැවිරිදි පොලිස් සැරයන් ඒ.පී. සුනිල් මියගියා.