ගෑස් මිල සංශෝධනයක් අද දිනයේදී සිදු කිරීමට අපේක්ෂා කරන බව ලිට්රෝ සමාගම පවසනවා. එහි සභාපති මුදිත පීරිස් කොළඹ පැවති මාධ්‍ය හමුවකට එක්වෙමින් පසුගියදා මේ බව කියා සිටියා.

එසේම, ඔහු එහිදී කියා සිටියේ තම සමාගම සතුව ප‍්‍රමාණවත් තරම් ගෑස් තොග පවතින බවයි. වෙළඳපලේ මේ වනවිට පවතින ගෑස් හිඟය මතුව ඇත්තේ අලෙවි නියෝජිතයින්, මිල අඩුවන බවට පළවන වාර්තා සැළකිල්ලට ගෙන තොග ඇණවුම් කිරීම ප‍්‍රමාද කිරීම හේතුවෙන් බවද සභාපතිවරයා එහිදී සඳහන් කළා.

මේ අතර, මෙම සතියේ ඉන්ධන මිලෙහි සශෝධනයක් සිදුවෙතැයි අපේක්ෂාවෙන් ඉන්ධන පිරවුම්හල් හිමියන් බොහෝ පිරිසක් ඇණවුම් සීමිත කර තිබූ අතර එමඟින් කොළඹ ඇතුළු ප‍්‍රදේශ කිහිපයක ඉන්ධනහල් ආශ‍්‍රිතව පෝලිම් හටගෙන තිබූ බව අප වාර්තාකරුවන් සඳහන් කළා.

කෙසේ වෙතත්, මේ වනවිට ඉන්ධන පිරවුම්හල් හිමියන් ඉන්ධන සාමාන්‍ය පරිදි යළිත් ඇණවුම් කරමින් සිටින බව ලංකා පෞද්ගලික ටැංකි රථ හිමියන්ගේ සංගමය පවසනවා. ඒ අනුව ඉන්ධනහල් ආශ‍්‍රිතව හටගෙන ඇති රථවාහන පෝලිම් කඩිනමින් මග හැරී යනු ඇති බවයි ඔහු සඳහන් කළේ.

එසේම, මෙම සතිය තුල ඉන්ධන මිලේ සංශෝධනයක් සිදුනොවන බව විදුලිබල හා බලශක්ති අමාත්‍ය කංචන විජේසේකර පසුගිය 03 වැනිදා ප‍්‍රකාශ කළා.