අනුරාධපුර – සමූහගොවිපළ – පුබුදුපුර ප‍්‍රදේශයේදී හෙරෝයින් වැටලීමකට ගිය පොලිස් නිලධාරීන්ගේ රාජකාරියට බාධා කළ කාන්තාවන් 06 දෙනෙකු අනුරාධපුර කොට්ඨාශ අපරාධ විමර්ශන අංශය විසින් අත්අඩංගුවට ගෙන තිබෙනවා.

පොලිස් මාධ්‍ය ප‍්‍රකාශක කාර්යාලය සඳහන් කළේ මොවුන්ට අමතරව හෙරෝයින් ලඟ තබා ගත් 04 දෙනෙකු ද පොලිසිය අත්අඩංගුවට ගෙන ඇති බවයි.

හෙරෝයින් ජාවාරමට සම්බන්ධ සැකකරුවන් පිරිසක් පුබුදුපුර ප‍්‍රදේශයේ නිවසක රැදී සිටින බවට පොලිසියට ලද තොරතුරක් මත ඊයේ මෙම වැටලීම සිදුකර තිබෙනවා. එහිදී එක් සැකකරුවෙකු පළාගොස් ඇති අතර පසුව එහි සිටි 4 දෙනෙකු මෙලෙස අත්අඩංගුවට ගෙන තිබුණා.

අනතුරුව ඔවුන් පොලිසියට රැගෙන ඒමට සූදානම් වන අවස්ථාවේ සැකකරුවන්ගේ ඥාතීන් බව පැවසෙන කාන්තාවන් 06 දෙනෙකු පැමිණ පොලිසිය වෙත ගල් ප‍්‍රහාර එල්ල කර තිබෙනවා.

ඒ අනුවයි අදාළ කාන්තාවන් 06 දෙනාද පොලිසිය අත්අඩංගුවට ගෙන ඇත්තේ. මෙම කාන්තාවන් අවුරුදු 23ත් 53ත් අතර වයස්වල පසුවනවා.

පොලිස් රාජකාරියට බාධා කර අඩත්තේට්ටම් කිරීම, නීති විරෝධී රැස්වීමක සාමාජිකයන් වීම සහ ගල්වලින් පහරදී තුවාල සිදු කිරීම මෙම කාන්තාවන්ට එල්ල වී ඇති චෝදනායි.

පහර දීමෙන් තුවාල ලැබූ පොලිස් නිලධාරියෙකු ද මේ වනවිට අනුරාධපුර රෝහලේ ප‍්‍රතිකාර ලබනවා.