ජනාධිපති රනිල් වික‍්‍රමසිංහ විසින් රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යාංශයේ ලේකම්වරයා ලෙස නීල් බණ්ඩාර හපුහින්න පත් කර තිබෙනවා.

ඔහු මීට පෙර කාන්තා, ළමා කටයුතු හා සමාජ සවිබලගැන්වීමේ අමාත්‍යාංශයේ ලේකම්වරයා ලෙස කටයුතු කළ බවයි ජනාධිපති මාධ්‍ය අංශය සඳහන් කළේ.

එසේම, මීට පෙර රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යාංශයේ ලේකම්වරයා ලෙස කටයුතු කළ එම්.එම්.පී.කේ මායාදුන්න පත් කර ඇත්තේ ප‍්‍රවාහන හා මහාමාර්ග අමාත්‍යාංශයේ ලේකම්වරයා ලෙසයි. මෙම පත්කිරීම් ජනවාරි පළවනදා සිට කි‍්‍රයාත්මක වන පරිදි සිදුකර තිබෙනවා.

එසේම, යාපනය දිස්ත‍්‍රික් ලේකම්වරයා ලෙස කටයුතු කළ කේ. මහේෂන්, ක‍්‍රිඩා හා යෞවන කටයුතු අමාත්‍යාංශයේ ලේකම් ලෙසත්, කම්කරු හා විදේශ රැකියා අමාත්‍යාංශයේ අතිරේක ලේකම් ලෙස කටයුතු කළ එම්. යමුනා පෙරේරා, කාන්තා හා ළමා කටයුතු හා සමාජ සවිබලගැන්වීමේ අමාත්‍යාංශයේ ලේකම්වරිය ලෙස පත් කර තිබෙනවා.

රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යාංශයේ අතිරේක ලේකම්වරයා ලෙස කටයුතු කළ එම්.එම්.නයිමුදීන් පත් කර ඇත්තේ ආයෝජන ප‍්‍රවර්ධන අමාත්‍යාංශයේ ලේකම්වරයා ලෙසයි.

පුද්ගලයින් ලියාපදිංචි කිරීමේ දෙපාර්තමේන්තුවේ කොමසාරිස් ජනරාල්වරයා ලෙස කටයුතු කළ වියානි ගුණතිලක මහජන ආරක්ෂක අමාත්‍යාංශයේ ලේකම්වරයා ලෙස පත් කර තිබෙනවා.

එසේම, වෙළඳ, වානිජ හා ආහාර සුරක්ෂිතතා අමාත්‍යාංශයේ ලේකම්වරයා ලෙස ඒ.එම්.පී.එම්.බී. අතපත්තු පත් කර ඇති අතර ඔහු මීට පෙර ජනාධිපති ජ්‍යෙෂ්ඨ අතිරේක ලේකම් ලෙස කටයුතු කළා.

කෘෂිකර්ම අමාත්‍යාංශයේ අතිරේක ලේකම්වරයා ලෙස කටයුතු කළ ආර්.එම්.ඩබ්ලිව්.එස්. සමරදිවාකර සංචාරක හා ඉඩම් අමාත්‍යාංශයේ ලේකම්වරයා ලෙසයි පත් කර ඇත්තේ.

මේ අතර, අධ්‍යාපන අමාත්‍යාංශ ලේකම් නිහාල් රණසිංහ, වාරිමාර්ග අමාත්‍යාංශ ලේකම් යූ.ඞී.සී.ජයලාල්, අධිකරණ, බන්ධනාගාර කටයුතු හා ආණ්ඩුක‍්‍රම ව්‍යවස්ථා ප‍්‍රතිසංස්කරණ අමාත්‍යාංශ ලේකම් වසන්තා පෙරේරා යළිත් එම අමාත්‍යාංශවලම ලේකම් ධුරයට වසරක කාලයක් ස`දහා පත් කිරීමටයි ජනාධිපතිවරයා කටයුතු කර ඇත්තේ.

මේ අතර, ජනාධිපති රනිල් වික‍්‍රමසිංහ විසින් නව පළාත් ලේකම්වරුන් දෙදෙනෙකු පත් කර තිබෙනවා. ජනාධිපති මාධ්‍ය අංශය සදහන් කළේ කොළඹ දිස්ත‍්‍රික් ලේකම් ප‍්‍රදීප් යසරත්න බස්නාහිර පළාත් ලේකම් වරයා ලෙසත් සබරගමුව පළාතේ අධ්‍යාපන ලේකම් මහින්ද සනත් විරසූරිය එම පළාතේ ප‍්‍රධාන ලේකම්වරයා ලෙස පත්කර ඇති බවයි.