රාජ්‍ය සේවකයින්ගේ වැටුප හෙට (25) නියමිත පරිදි ගෙවීමට කටයුතු කරන බව මුදල් රාජ්‍ය අමාත්‍ය රංජිත් සියඹලාපිටිය ප‍්‍රකාශ කළා.

මේ අතර, රජයේ නව බදු ප‍්‍රතිපත්තියට එරෙහිව ලංකා බැංකු සේවක සංගමය, රජයේ වෛද්‍ය නිලධාරින්ගේ සංගමය, කොළඹ වරායේ වෘත්තීය සමිති සහ රෝහල් කනිෂ්ඨ කාර්ය මණ්ඩලය ඊයේ වෘත්තීය ක‍්‍රියාමාර්ගවල නිරත වුණා. ඒ අනුව ලංකා බැංකු සේවක සංගමය කළු වර්ණයෙන් සැරසී සේවයට වාර්තා කර තිබුණා.

ඔවුන් නව බදු ප‍්‍රතිපත්තියට එරෙහිව පෙත්සමක්ද පසුගියදා අත්සන් කළ අතර ලංකා බැංකු සේවක සංගමයේ ප‍්‍රධාන ලේකම් රංජන් සේනානායක කියා සිටියේ එම විරෝධතා පෙත්සම ඊයේ දහවල් ජනාධිපති කාර්යාලයට භාරදුන් බවයි.

එමෙන්ම කොළඹ වරායේ වෘත්තීය සමිති ඊයේ දහවල් වරාය ප‍්‍රධාන පිවිසුම අසළදී විරෝධතාවක නිරත වූයේද නව බදු ප‍්‍රතිපත්තියට එරෙහිවයි. විරෝධතාවය හේතුවෙන් කොළඹ කොටුව, මල්වත්ත පාර සහ අබ්දුල් කාදර් මාවතද සම්පූර්ණයෙන් අවහිර වුණා.

මේ අතර, රජයේ වෛද්‍ය නිලධාරින්ගේ සංගමයේ සාමාජිකයින්ද බදු ප‍්‍රතිපත්තියට එරෙහිව ඊයේ කළු පටි පැළඳ කළු ඇදුමෙන් සැරසී සේවයට වාර්තා කර තිබුණා. එහිදි ඖෂධ හිඟයට විසදුම් ඉල්ලා ඔවුන් කොළඹ ජාතික රෝහලේදි මහජන පෙත්සමකටද අත්සන් තැබීම සිදුකළා.

එමෙන්ම රජයේ බදු ප‍්‍රතිපත්තියට එරෙහිව සහ තවත් ඉල්ලීම් කිහිපයක් මුල්කරගනිමින් රෝහල් කණිෂ්ඨ කාර්ය මණ්ඩලය ඊයේ උදෑසන 08 සිට ක්‍රියාත්මක කළ පැය 4 ක සංකේත වර්ජනය හේතුවෙන් රෝහල්වල බාහිර රෝගී අංශයේ කටයුතු සඳහා බාධා එල්ල වුණා.