උපකාරක පන්තියකට සහභාගී වන බව නිවෙස්වලට පවසා අම්පාර – උදයපුර ප්‍රදේශයේ පාළු නිවසක මත්පැන් පානය කරමින් සිටි තරුණියන් තිදෙනකු සහ තරුණයන් තිදෙනකු අත්ඩංගුවට ගත් බව අම්පාර පොලිසිය පවසනවා.

මෙලෙස අත්අඩංගුවට ගෙන ඇත්තේ අම්පාර – පන්නල්ගම සහ බක්මිටියාව ගම්මානවල පදිංචි තරුණ තරුණියන් පිරිසක් වන අතර, ඔවුන් සියළු දෙනාම 18 හැවිරිදි වියේ පසුවන්නන්.

110 හදිසි ඇමතුම් සේවාවට ලද තොරතුරෙකට අනුව, අම්පාර මූලස්ථාන ප්‍රධාන පොලිස් පරීක්ෂක අසේල කේ. හේරත් මහතාගේ උපදෙස් පරිදි සිදුකළ වැටලීමකදි මත්පැන් පානය කළ බවට සැකපිට අත්අඩංගුවට ගත් තරුණියන් තිදෙනා සහ තරුණයන් තිදෙනා අම්පාර මහ රෝහලේ වෛද්‍යවරයකු වෙත ඉදිරිපත් කිරිමෙන් පසු බීමත්ව සිටි බවට තහවුරු වූ බවයි පොලිසිය කියා සිටියේ.

ඔවුන්ගෙන් සිදුකළ ප්‍රශ්න කිරිම්වල දී, සියළු දෙනාම උපකාරක පන්ති සඳහා සහභාගි වීමට අම්පාරට පැමිණ ඇති බවත්, තරුණයන් රැගෙන එන ලද මත්පැන් සියළු දෙනාම එක්ව පානය කර ඇති බවත් අනාවරණය වී තිබෙනවා.