තැපැල් සේවකයන් ආරම්භ කළ වැඩවර්ජනය හේතුවෙන් මධ්‍යම තැපැල් හුවමාරුව ඇතුලු අනෙකුත් තැපැල් කාර්යාලවල ලිපි සහ පාර්සල් ලක්ෂ හතක් පමණ සිරවී ඇතැයි තැපැල් වෘත්තිය සමිති පවසනවා. 

මධ්‍යම තැපැල් හුවමාරුවේ පමණක් දේශීය සහ විදේශීය තැපැල් භාණ්ඩ ලක්ෂ  4 ක් පමණ  සිරවී ඇතැයිද ඒකාබද්ධ තැපැල් වෘත්තිය සමිති පෙරමුණේ සම කැඳවුම්කරු සම්පත් ලියනගේ මහතා කියා සිටියා. 

ඓතිහාසික වටිනාකමකින් යුත් නුවරඑළිය සහ මහනුවර තැපැල් කාර්යාල ගොඩනැගිලි පෞද්ගලික අංශයට පවරා ගැනීම, නව බඳවා ගැනීම් කඩිනම් කිරීම, වැටුප් වැඩිකිරීම ඇතුළු කරුණු කිහිපයක් මුල්කර ගනිමින් ඊයේ පස්වරු 4.00සිට පැය 48 ක කාලයක් සඳහා තැපැල් වෘත්තීය සමිති විසින් මෙම වර්ජනය ආරම්භ කරනු ලැබුවා. 

වර්ජනය හේතුවෙන් මධ්‍යම තැපැල් කාර්යාල කටයුතු ඇතුලු සියලුම සේවාවන් අද දිනයේත් ඇණහිට තබූ අතර ඇතැම් තැපැල් ස්ථාන ඉබි යතුරු දමා වසා දමා තිබූ අයුරු දැකගත හැකිවුණා. 

වර්ජනයෙන් ලිපි හා පාර්සල් බොදාහැරිම, විදුලි පණිවිඩ බෙදාහැරීම, මුදල් ඇණවුම්, විශ්‍රාම වැටුප් සහ සුබ සාධන දීමනා ගෙවීම් ඇතුලු තැපැල් කාර්යාලය අනුබද්ධ සියලුම සේවාවන් මුළුමනින්ම ඇණහිටීමෙන් මහජනතාව දැඩි අපහසුතාවයට පත්වුණා.