රතු ඉන්දියානුවෝ

ඇමරිකාවේ ජීවත් වන ස්වදේශික ජන කොටස් රතු ඉන්දියානුවන් ලෙස හැඳින්වේ. එමෙන් ම මොවුන් ඇමෙරිකන් ඉන්දියානුවන් ලෙස ද හඳුන්වයි. මොවුහු සිය වාසස්ථාන ලෙස වනාන්තරවල තිබෙන ගල්ගුහා, ලෙන් ආදිය තුළ කුඩා නිවාස තනා ගනිති. ආහාර සපයා ගැනීම සදහා ප්‍රධානව ම සතුන් දඩයම් කිරීම හා ධීවර කටයුතු සිදුකරයි. ආහාර ලෙස වේලාගත් මස්, ඉඟුරු මෙන් ම බෝංචි ආදිය ද ලබා ගනී. රතු ඉන්දියානුවන්ගේ තිබෙන විශේෂත්වයක් වන්නේ දුටු විගසම හඳුනා ගැනීමේ හැකියාවයි. එමෙන් ම මොවුන්ගේ ජීවන රටාව අධ්‍යයනය කිරීමේ දී එය ඔවුනට ම ආවේණික වූවක් බව අවබෝධ කරගත හැකිය. හස්ත කර්මාන්ත වලට නිපුණත්වයක් දක්වන මොවුහු ආභරණ, මැටි බදුන් ආදිය සෑදීමට දස්කම් දක්වති. මේ වන විට රතු ඉන්දියානුවන් ඇමෙරිකාවේ මිලියන දෙකක් පමණ ද, කැනඩාවේ මිලියනයක් පමණ ද වාසය කරනු ලබයි.

දේශ ගවේෂක ක්‍රිස්ටෝපර් කොලම්බස්ගේ ආගමනයෙන් අනතුරුව නැව් නැගී ආ අයවලුන් ඇමරිකා මහද්වීපයේ ජනාවාස පිහිටුවා ගැනීමට කටයුතු කළහ. යුරෝපීය ජනාවාසකරණයත් සමඟ ම වනාන්තර එළකිරීම් සිදුවන්නට විය. මේ හේතුවෙන් රතු ඉන්දියානුවන් හෙවත් ස්වදේශක ඇමරිකානුවන්ගේ ජීවිතවලට මෙන් ම ඔවුන්ගේ වාස භූමිවලට ද තර්ජන එල්ලවිණි. දීර්ඝකාලීනව පැවැති ගැටුම්වල ප්‍රතිඵලයක් ලෙස 1830 දී පමණ ඇමෙරිකානු ආණ්ඩුව, රතු ඉන්දියානුවන් ඔවුන්ගේ මව්බිමෙන් පිටුවහල් කිරීම සඳහා පනතක් ද සම්මත කළේය. ඒ අනුව රතු ඉන්දියානුවන්ට සිය පාරම්පරික වාස භූමි වලින් ඉවත් වී රක්ෂිත ප්‍රදේශවලට යාමට නියම විය. 

මොවුන්ගේ ඇදහිලි හා විශ්වාස අතර මරණින් අනතුරුව සිය ආත්ම දඩයම් සරුවට තිබෙන ප්‍රදේශයකට යන බවට තරයේ විශ්වාස කරති. එමෙන් ම මොවුන් හිරුට, වර්ෂාවට හා වලාකුළුවලට දේවත්වය ආරෝපණය කරගත් කොට්ඨාසයක් විය. ඒ අනුව මූලිකව ම වන්දනා කරන දෙවිවරු විශාල සංඛ්‍යාවක් විය. එම වන්දනාවන් සඳහා මොවුන් පූජනීය ස්ථාන ද ගොඩනගාගෙන තිබුණි. දියුණු සන්නිවේදන ක්‍රම මොවුන් සතුව පැවතුණු අතරන් චිරෝකීස් ගෝත්‍රිකයන් භාෂාවක් හා හෝඩියක් ද නිර්මාණය කරගෙන තිබුණි. ක්‍රිස්තු වර්ෂ 1400-1500 අතර කාලයේ දී මොවුන් වෙඩි බෙහෙත් තුවක්කු ආදිය ද අශ්වයින් හීලෑ කිරීමේ ශාස්ත්‍රය ද ස්පාඤ්ඤවරුන්ගෙන් ඉගෙන ගෙන ඇත. යුරෝපීයයන් උතුරු ඇමරිකාවට ගොඩ බසින විට මෙම ඇමෙරිකානු ඉන්දියානුවෝ ගෝත්‍රික ලක්ෂණවලින් බැහැර වී දියුණු ශිෂ්ටාචාරයක් ගොඩනගා ගනිමින් සිටියහ. එමනිසා මෙම ගෝත්‍රිකයන් හා සටන් කිරීම යුරෝපිකයන්ට පහසු කාර්යයක් නොවීය. විවිධ උපක්‍රම භාවිත කරමින් ගෝත්‍රිකයන් ඔවුන්ගේ නිජ භූමිවලින් පලවා හරින්නට ඉංග්‍රීසීන් කටයුතු කළ අතර අද වන විට රතු ඉන්දියානුවන් නාම මාත්‍රික ඓතිහාසික මානව ගෝත්‍රයක් බවට පත් වී ඇත.

රතු ඉන්දීය නායක සියැටෙල්

ඩුවාමිෂ් ගෝත්‍රිකයකු වන සියැටෙල් වර්ෂ 1780 දී වොෂින්ටනයේ බ්ලෙක් දූපතේ උපත ලබා ඇත. සීන්ල්, සියාත්ල්, සී ඇත් ආදී නම් වලින් ඔහු හඳුන්වා ඇති අතර මෙම නායකයා ප්‍රකට වූයේ සියටැල් නමනි. එලෙස ම තුරුණු වියේදී ම යුද්ධ විරුවෙකු වූ මොහු ගෝත්‍ර නායකයා බවට පත් විය. ඔහු ලාබාල වයසේදී ම ගෝත්‍ර හයක නායකත්වය ද උරුම කර ගත්තේය. ස්වදේශීය ජනතාව වෙනුවෙන් පෙනී සිටිය ශ්‍රේෂ්ඨ රතු ඉන්දියානු නායකයා මොහු වේ. ඔහු ලේඛනගත කළ ලෝකප්‍රකට 'සියැටෙල්ගේ ලිපිය' මගින් මිනිසා හා ජීවීන් අතර පවතින සම්බන්ධතාවය මැනවින් අවබෝධ කරගෙන සිටි බව තහවුරු කරන අතර ඩාවින්ගේ පරිණාමවාදය ඉදිරිපත් වීමටත් පෙර මෙවැනි අධි පරිසර සංවේදී ප්‍රකාශයක් ඉදිරිපත් කිරීම වත්මන් තාක්ෂණික මිනිසා ද විස්මයට පත් කරන්නකි. සියැටෙල් අවුරුදු 78ක් ආයු වළඳා 1866 දී පුගට් සවුන්ට්හි දි සිය අවසන් හුස්ම විශ්වයට මුදා හළේ ය. ඔහුට ගෞරව කරනු වස් සුදු ජාතිකයෝ සියැටෙල්ගේ උපන් ගම්මානය පිහිටි ජනපදය සියැටෙල් නමින් නම් කළේය. එම ප්‍රදේශය අද දක්වා ද හැඳින්වෙන්නේ සියැටෙල් නමිනි.

සියැටෙල්ගේ ලිපිය

මෙම ලිපිය පරිසරයේ පිළිබඳ මෙතෙක් කර ඇති දාර්ශනික හා සාරගර්භත්වයෙන් යුක්ත වූ ලේඛනය ලෙස සැලකෙයි. මිනිසාත් පරිසරයත් අතර ඇති සමීප සම්බන්ධතාවය ගැන ගැඹුරු විවරණයක් මෙහි අන්තර්ගත ය. මෙය රතු ඉන්දියානු නායක සියැටෙල් විසින් තම නිජ භූමිය මිලට ගැනීමට තැත් කළ දාහතරවන ඇමෙරිකානු ජනාධිපති ෆෑන්ක්ලීන් පියර්ස්ගේ එම ක්‍රියාව සම්බන්ධයෙන් ඊට පිළිතුරු පත්‍රයක් වශයෙන් මෙම ලිපිය ලියා ඇත. ඔහු ප්‍රථමයෙන් ම මෙම ප්‍රකාශය සිදුකර ඇත්තේ Lushootseed නම් භාෂාවකින් වන අතර පසුව එය Chinook Jargon නම් තවත් භාෂාවකට පරිවර්තනය කර ඇත. පසු කලෙක දී Dr. Henry Smith තැනැත්තෙක් වසර 30කට පසු එය ඉංග්‍රීසි බසට හරවා ඇත. ඒ වනවිට සියැටෙල් මියගොස් වසර 16ක් පමණ ගත වී ඇත. ඔහු ජීවත් වූ කාලය තුළ නොල ද ජනප්‍රියත්වයක් එම ප්‍රකාශය එළි දැක්වීමෙන් පසුව ඔහුට හිමි විය. ම්ලේච්ච යැයි සලකනු ලැබුණු සියැටෙල්ගේ හදවතින් නික්මුණු එම වදන් ලෝකයක් මවිත කළේය. එක්සත් ජාතීන්ගේ පරිසර සංවිධානය (UNEP) මගින් මෙය මෑතක දී සමාජගත කරන ලදී. පහතින් දැක්වෙනුයේ ඔහු ලියූ ලිපියේ සිංහල පරිවර්තනයයි.

"සුවිසල් නුවරක් වූ වොෂින්ටන් හි සුදු ජාතික නායකතුමා අපගේ ඉඩම් මිලදී ගැනීමට අපේක්ෂා කරන බව ප්‍රකාශ කර සිටී. ඒ සමග එතුමා අප කෙරෙහි මිත්‍රත්වය සහ සුහද බවද පළ කර ඇත. එයින් ඔහුගේ කාරුණික බව පිළිබිඹු වේ. අප හා මිත්‍ර වූවා යැයි ඔහුට යම් ප්‍රයෝජනයක් වේ නම් ඒ අල්පමාත්‍ර වශයෙනි. එහෙත් අපි ඔහුගේ යෝජනාව කෙරෙහි අවධානය යොමු  කර සිටිමු. අප ඉඩම් විකිණීමෙන් වැළකී සිටියහොත් සුදු මිනිසුන්  පැමිණ අවි බලයෙන් ඉඩම් පැහැර ගන්නා බව නිසැකය. එහෙත් නිල් අහසත් පොළවේ ඇති උණුසුමත් විකිණීමට හෝ මිලදී ගැනීමට හැකිද..? එය මට නොවැටහේ. මේ අදහස අප හට නම් අරුමයකි. සුළගේ ඇති පවිත්‍ර බව නැවුම් බව ජලයේ ඇති ප්‍රභාවත්‘ බව අප සන්තක නොවේ. එසේ නම් ඔබ ඒවා මිලදී ගන්නේ කෙසේද..?

මේ මහ පොළොවේ සෑම බිම් අඟලක්ම මාගේ ජනතාවට පූජනීයයි. පාරිශුද්ධයි.  ලා හිරු එළියෙන් බබළන දේව දාර ගස්වල සෑම සිහින් පත්‍රයක්ම වැලි තලාවන්ගෙන් වැසුණු සෑම වෙරළ  තීරයක්ම, සෑම එළිමහන් බිමක්ම, අදුරින් බර වූ වනපෙත් වසා පැතිරුණු සෑම මිහිදුම් සලුවක්ම, බිඟු නද පතුරවන සෑම කුඩා ජීවියෙකුම මාගේ ජනතාවගේ සිත තුළත් ඔවුන් ලද අත්දැකීම්වලත් ශුද්ධ වස්තූන්  වේ. ගස් වලින් රෑටා වැටෙන සෑම දිය බිදුවක් තුළට රතු ඉන්දියානුවන් පිළිබද මතක සටහන් ගැබ් වී තිබේ. සුදු ජාතිකයෝ අහසේ තරු මත පා තබන්නට යන විට ඔවුන්ගේ උපන් බිම අමතක කර දමති. එහෙත් අපගේ මළගිය ඇත්තෝ කිසිවිට මේ මහ පොළොව අමතක නොකරති. ඒ රතු ඉන්දියානුවන්ගේ සදාදර මතෘත්වය මහ පොළොව වන බැවිනි. අප පෘථිවියේ කොටසකි. පෘථිවිය  අපේ කොටසකි. සුවඳැති මල් අපගේ සොයුරියෝ වෙති. මුව පොව්වෝ, රාජාලියෝ හා අශ්වයෝත් අපගේ සොහොයුරෝ වෙති. ගිරි මුදුන්වල සිට තණ බිම් වනාන්තර අතරින් ගලා බස්නා දිය දහරා ද අශ්වයාගේ සහ මිනිස් සිරුරේ උණුසුම ද යන මේ හැම දේ එකම පවුලක සාමාජිකයන්ය.

අපගේ ඉඩම් මිලදී ගැනීමට සුදු ජාතික නායකතුමා අදහස් කරන බව අප වෙත දන්වා සිටිය ද ඔහුගේ ඉල්ලීම ඉටු කිරීමට අපට ඉතා දුෂ්කර වූ දෙයකි. අපට කරදරයකින් තොරව ජීවත් විය හැකි පරිදි සුදුසු ස්ථානයක් වෙන් කර දෙන බව ප්‍රබල සුදු නායකතුමා දන්වා සිටී. එවිට ඔහු අපගේ පියා බවට පත් වනු ඇත. අප ඔහුගේ දරැවන් වනු ඇත. එමනිසා ඔහු අපගේ ඉඩම් මිලදි ගැනීමට කරන යෝජනාව ගැන අපි සලකා බලන්නෙමු. එහෙත් එය අපට ලෙහෙසි පහසු දෙයක් නොවේ. මක්නිසා ද යත් මේ භූමිය අපට පූජනීය වස්තුවක් වන බැවිනි. ගංගා ඇළදොළ දිළිසෙමින් ගලා බස්නා ජලය හුදෙක් දිය දහරාවන්ම නොවේ. ඒ අපේ මුතුන් මිත්තන්ගේ රුධිරයයි. අප ඔබට අපගේ ඉඩම් විකිණුවහොත් මේ ඉඩම් අපට පූජනීය වස්තුවක් බව ඔබගේ දරුවන්ටද ඔබ වටහා දිය යුතුයි. අපගේ භූමියේ පිහිටි ජලාශයන්හි සෑම පිවිතුරු දියමතුපිට පතිත වන සෑම පිළිඹිබුවක්ම මාගේ ජනතාවගේ ජීවිතයේ විවිධ සිද්ධීන් හා මතක සටහන් පවසයි. ජලයෙන් නැගෙන සිහින් හඬ මාගේ පිය පාර්ශවයේ මුතුන් මිත්තන්ගේ හඬය. මේ ගංගාවෝ අපගේ සොයුරෝය. ඔවුහු අපගේ පිපාසය සන්සිඳුවාලති. අපගේ දරුවන් පෝෂණය කරති. ගංගාවන් අපගේ මෙන්ම ඔබගේ ද සහෝදරයන් බව සිහිතබාගනු මැනවි. ඒ බව ඔබගේ දරුවන්ට ද කියා දෙනු මැනවි. එහෙයින් මින් මතුවට ඔබ විසින් ඔබගේ සොයුරනට දක්වන කරුණාව ගංගාවලට ද දක්වන්න.

උදෑසන හිරු නැග එන විට කඳුකරයේ ඇති මිහිඳුම් පටල සැඟවී යන්නාක් මෙන් සුදු මිනිසුන්ගේ ආක්‍රමණ හමුවේ රතු ඉන්දියානුවෝ නිතරම පසු බැස සිටියහ. ඔවුන්ගේ සුසාන භූමි මෙන්ම කඳුකරයන් ද ගස් වැල් ද මහ පොළොවේ මෙම භූමි භාගය ද, අපට ශුද්ධ භූමි වන්නේය. සුදු මිනිසුන්ට අපගේ ගති පැවතුම් තේරුම් ගැනීමට නොහැකි බව අපි දනිමු. මහ පොළොව ඔවුන්ට සහෝදරයෙක් නොව සතුරෙකි. එක් තැනකදී එය ජයගෙන තවදුරටත් එය යටත් කර ගැනීම සඳහා ඔවුහු ඉදිරියට ගමන් කරති. ඔවුහු තම පියවරුන්ගේ සුසාන භූමි කිසිදු සැලකිල්ලකින් තොරව අත්හැර දමා යති. මහපොළොව එහි දරුවන්ගෙන් උදුරා ගනිති. ඔවුහු සිය මාතාව වන මිහිකත ද සිය සොයුරා වන නිල් අහස ද මිලට ගත හැකි දේ ලෙස සලකති. මහපොළොව ද වීදුරු පබළු මෙන් විකිණිය හැකි දේ ලෙස සලකති. මේ නිසාම යම් දිනක ඔවුහු මේ මහපොළොව විනාශ කොට එය කාන්තාරයක් බවට පත් කරනු ඇත. සුදු ජාතිකයින් විසින් ගොඩනගා ඇති නගර අපගේ ඇසට වේදනා ගෙන දෙයි. ඒ රතු ඉන්දියානුවන් වන අප ඔබගේ ගති පැවතුම් නොහඳුනන මිලේච්ජයන් නිසා විය හැකිය. ඒ නගරවල නිහඬ නිසංසල තැනක් සොයා ගැනීමට නොහැකිය. වසන්ත සමයේ දී ගස්වැල්වල ලා දලු පිබිදෙන ස්වරයවත් කුරුමිනියන්ගේ පියාපත් වලින් නැගෙන සර සර හඬ ඇසීමට හෝ සුදුසු තැනක් එහි නැත. ඒ වෙනුවට නාගරික පරිසරයෙන් නැගෙන කඨෝර ශබ්ද දෙසවනට නිගා දෙයි. හුදකලාව වෙසෙන නීල කොබෙයියෙකුගේ මිහිරි ස්වරය හෝ රාත්‍රියේ විල් තෙරක රුස්ව වාද විවාද කරන මණ්ඩුක ස්වරයක් ඇසීමට තැනක් නැත්නම් එසේ ජීවත් වීමෙන් ඇති ඵලය කුමක්ද..?

රතු ඉන්දියානුවන් වන අපට මේ අවට පරිසරයේ රුඳුණ වාතය ඉතා අගනා දෙයකි. ඒ මන්ද යත් ගහ කොළ සතුන් මෙන්ම මිනිසුන් වන අප හැම ද ආශ්වාස ප්‍රශ්වාස කරන්නේ මේ වාතයයි. එහෙත් සුදු මිනිසුන්ට ඒ බව හැගෙන බවක් නම් නොදැනේ. අපගේ මුතුන් මිත්තන් ඉපදුණ විට ආශ්වාස කිරීමට ඉඩදුන් වාතය ඔවුන් මිය යන මොහොතේ හෙළන අවසන් සුසුම් පොද ද ඊට එක්කර ගනී. එහෙයින් අපගේ ඉඩ කඩම් ඔබට විකිණුවහොත් ඔබ ද එම භූමි ශුද්ධ භූමි ලෙස වෙන්කොට තැබිය යුතුය. එවිට තණ නිල්ලෙහි පිපෙන මල් වලින් සුවඳවත් වූ සුළං රුළි ආඝ්‍රාන කිරීමට සුදු මිනිසාට ද ඒවා කරා යා හැකිවන හෙයිනි.

ඉඩම් මිල දී ගැනීමට ඔබ කරන යෝජනාව අප පිළිගතහොත් ඔබ ද අපගේ එක් කොන්දේසියක් පිළිගත යුතුය. එනම් සුදු මිනිසුන් වන ඔබ මේ භූමියේ වසන සියලු සතුන් තම සොයුරන් සේ සැලකිය යුතුය. දිවෙන දුම්රියවල සිට සුදු මිනිසුන් විසින් වෙඩිතබා මරා දමන ලද වල් හරකුන් දහස් ගණනකගේ සිරුරු දිරාපත්ව යන සැටි මම දුටුවෙමි. අප වල් හරකෙකු මරා දමන්නේ පණ නල රුක ගැනීම සඳහා පමණි. එහෙත් පණ ඇති වල් හරකුන්ට වඩා යකඩ යකා වැදගත් වන්නේ කෙසේද..? මට නොවැටහේ. ඒ මා මිලේච්ජයකු වන නිසා විය හැක. සිවුපා සතුන් නොමැති තැන මිනිසාට ඇති තැන කුමක්ද..? සියලු සිවුපා සතුන් මිහිමතින්  සමුගතහොත් මිනිසා ද මහත් කාන්සියකින් මියයනු ඇත. මන්ද සිවුපා සතුන්ට සිදුවන ඕනෑම දෙයක් වැඩිකල් නොයා මිනිසාට ද සිදුවිය හැකි බැවිනි. අපගේ ඥාතීන්ගේ ජිවිත වලින් මහපොළොව සරුසාර වූ බවත් මහ පොළොව අපගේ මාතාව බව අප විසින් අපගේ දරැවන්ට කියාදුන් බවත් ඔබලාගේ දරැවන්ට පවසන්න. එවිට ඔවුන් මහපොළොවට ගරු කරනු ඇත. මේ භූමිය කෙලෙසන මිනිසා එවිට සිදුකරනුයේ තමා විසින් තමාම කෙලෙසා ගැනීමයි. ඒබව අපි හැම දෙනාම දනිමු. එක පවුලක සියලුදෙනා එකම ලෙයින් බැදී සිටින්නා සේ සොබාදහමේ ඇති සියලුදේ එක බැඳීමකින් බැඳි පවතී. මිහිකත ඇති ජීව ජාලය මිනිසා විසින් ගෙතුවක් නොවේ. මිනිසා යනු එහි එක් හුයක් පමණි. මේ ජාලයට මිනිසා විසින් යම් හානියක් පමුණවනු ලද ද ඔහු එයින් තමාටම හානි කර ගනී. ඒ බව මතක තබා ගන්න.

එහෙත් ඔබ විසින් අප වෙනුවෙන් වෙන් කරන ලද රක්ෂිත භූමියට යාම පිළිබඳව අපි සලකා බලමු.  එහි ඔබගෙන් වෙන්ව සාමයෙන් හා සමාදානයෙන් වාසය කිරීමට හැකි වනු ඇත. අපේ ජීවිතයේ ඉතිරි ටික කාලය කොතැන වාසය කිරීමට යෙදුනත් කම් නැත. සිය මිනිසුන් සටනින් පරාජිතව දීන මිනිසුන්වන අයුරු අපගේ දරැවන් විසින් දක්නා ලදි. සටනින් පරාජයවීම නිසා ලැජ්ජාවට පත් අපගේ සෙබළු මිහිරි අහාර බුදිමින් මත්පැන් බොමින් අලසව දිවි ගෙවති. එම නිසා අපගේ ජීවත්වන ඉදිරිදින කිහිපය කොහේ ගෙව්වත් කම් නැත. දැනට කුඩා වන පොත් වලට කොටුවී සිටිය ද එදා මේ මහ පොළවේ සැරි සැරෑ මහා ගෝත්‍රිකයන් වන අපගේ දරැවන් සිය මුතුන් මිත්තන්ගේ සුසානයන්ට ගරු සැලකිලි දැක්වීමටවත් ඉතිරි නොවනු ඇත. එහෙත් කලෙක මේ ග්‍රෝතික දරැවෝ අද ඔබගේ දරුවන් මෙන් බල පරාක්‍රමයන්ගෙන් හා  අනාගත අභිලාෂයන්ගෙන් පිරිපුන්ව සිටි බව අමතක නොකරන්න. එහෙත් මාගේ ජනතාව මිහිමතින් තුරන්වයාම ගැන මා කම්පා වන්නේ කුමටද..? විවිධ ග්‍රෝත්‍රිකයන් සෑදී ඇත්තේ මිනිසුන්ගෙන් මිස වෙනත් කවරකුගෙන්වත් නොවේ. සාගරයේ ඇතිවන තරංග එහිම ඇතිවී එහිම ගැටේ. නැතිවී යයි. එමෙන්ම අපි හැම ද මිනිසුන් සමග පොළවේ ඉපිද නිරුද්ධ වී යමු. ස්වකීය මිතුරන් මෙන් සුදු මිනිසුන් සමග ජීවත් වන කතා කරන දෙවියන් වහන්සේට ද මේ ඉරනම අත්වනු ඇත.

කුමක් කීවත් කුමක් කළත් අපි හැම සොහොයුරෝ වන්නෙමු. අනාගතයේ සුදු මිනිසා විසින් සොයා ගන්නා එක් සත්‍යයක් එය බව අපි දන්නෙමු. එනම් අප අදහන දෙවියන් ඔවුන්ගේ ද දෙවියන් බව ඔවුන් විසින් දිනක වටහාගනු ඇත. දැන් අප සතු ඉඩම් අයිතිකර ගැනීමට ප්‍රාර්ථනාකරවාක් මෙන් දෙවියන් වහන්සේගේ අයිතිය නතුකර ගැනීමට ද ප්‍රාර්ථනා කරනවා විය හැකිය. එහෙත් ඔබට එය කළ නොහැක්කකි. ඔහු සියලුම මිනිසුන්ගේ දෙවියන් වහන්සේය. එබැවින් සුදු ජාතිකයාට මෙන් රතු ජාතිකයාට ද ඔහුගේ මෛත්‍රිය එකසේ බෙදී යයි. මේ පෘතුවිය දෙවියන් වහන්සේට ඉතාමත් අගනා වූවකි. එබැවින් පෘතුවියට හානි කරන පුද්ගලයන් ඔවුන්ගේ මැවුම්කරැවන්ට නිගා කරති. කවදා හෝ සුදු ජාතිකයන් ද මේ මහපොළොවේ සැඟව යනු ඇත. ඇතැම් විට එය අනෙක් ග්‍රෝත්‍රිකයින් සැඟවයාමට කලින් සිදුවනු ඇත. ඔබගේ සයනය ඔබ දිගින් දිගටම කෙලෙසමින් යන්න. යම් දිනක ඔබ එම ප්‍රවාහයේම ගිලෙනු ඇත. එහිම ගිලී මියයනු ඇත. යම් හේතුවක් නිසා ඔබ මේ භූමියට කැදවාගෙන පැමිණ, රතු ඉන්දියානුවන් අභිභවා ඔබගේ අධිපත්‍යය පැතිර වීමට ඉඩ සැලසූ දෙවියන් වහන්සේගේ ශක්තියෙන්ම යම් දිනක ඔබ ගිනිගෙන දැවී අහිමිව යනු ඇත. සියලු වල් හරකුන් මිහිමතින් සමුගෙන යන දිනයත්, සියලු වල් අශ්වයෝ හීලෑ කරගන්නා දිනයත් ,මිනිස් ගන්ධයෙන් වන පෙතෙන් සැඟවුන සෑම අස්කොන් පිරීයන දිවසත් අපි නොදනිමු. එබැවින් මිනිස් වර්ගයාගේ ඉරණම තවම අපිට අභිරහසකි. එවිට හිමෙන් වැසීගිය කඳු වළලු කොහේ දකින්නට ලැබේද..? රාජාලියන් හිමෙන් වැසීගිය අශ්වයන් මේ හැම වඳවී ගොසින්ය. විනාශ වී ගොසින්ය. දඩයම් කරන සතුන්ගෙන් සමුගැනීම කෙතරම් අප්‍රිය ජනක වේද..!. එය ජීවයේ අවසානයත්, නොමැරී යන්තම් පණ නල රුක ගැනීමේ ආරම්භයත් සනිටුහන් කරනු ඇත.

අප ඔබේ යෝජනාවට එකඟවේ  වන්නේ නම් ඊට හේතුව ඔබ අපට ලබා දීමට ප්‍රතිඥා දුන් රක්ෂිත භූමියහෝ ලබාදීමයි. එවිට අපගේ ජීවිතයේ ඉතිරි කෙටි කාලය එහි ගත කිරීමට හැකිවනු ඇත. අවසන රතු ඉන්දියානුවන් මේ භූමියෙන් සමුගත් දිනයක, ප්‍රෙයරිස් තණ බිම් හරහා පාවී යන වලාකුළක  සෙවණැල්ලක් බවට පත්වන දිනයක මේ භූමියේ  වෙරළ තීරය සහ වනපෙතේ මාගේ ජනතාවගේ  ආත්මය තව දුරටත් රඳවා ගනු ඇත. අලුත උපන් දරුවෙකු තම මවගේ හද ගැස්මට ආදරය කරන්නේ යම් සේද එසේම අපගේ ජනතාවෝ මේ මහ පොළොවට ආදරය කරති. මේ භූමිය විකුණුව හොත් මේ භූමියට අප මෙන්ම ආදරය කරන්න. අප මේ භූමිය රැකබලා ගත්තාක්  මෙන් ඔබ ද මේ භූමිය රුකබලා ගන්න. ඔබ මෙය මිලට ගන්නා අවස්ථාවේ මේ භූමිය තිබෙන අයුරැ ඔබ සිතෙහි තබා ගන්න. දෙවියන් වහන්සේ සෑම සියලු දෙනාටම එකසේ ප්‍රේම කරන බැවින් මෙම භූමිය ඔබගේ මුළු ශක්තියෙන් සිතෙන් මෙන්ම හදවතිනුත් ඔබගේ දරැවන් වෙනුවෙන් ආරක්ෂා කර තබන්න.

අපි එක දෙයක් දනිමු. එය නම් අපගේ දෙවියන් වහන්සේ ද ඔබගේ දෙවියන් වහන්සේ ද එකම දෙවියන් බවයි. ඔහුට මේ භූමිය ඉතා වටින්නේය. සුදු මිනිසාට යැයි ඉරණමේ වෙනසක් නැත. කුමක්  කීවත් කළත් අපි සොහොයුරෝ වෙමු. අනාගතයේ සිදු වන්නේ කුමක්ද..? එය අපට හොඳින් දැකබලා ගැනීමට හැකිවනු ඇත."

(පරිවර්තන උපුටා ගැනීම මුල් හිමිකරු සතුය.)

ප්‍රසිලා සඳරුවනි.