පාරිභෝගික කටයුතු පිළිබඳ අධිකාරිය සහ ලුණු නිෂ්පාදන ආයතන සමග සාකච්ඡාවක් පසුගියදා පාරිභෝගික අධිකාරියේ ප්‍රධාන කාර්යාලයේදී පවත්වා තිබෙනවා.

මෙම සාකච්ඡාවේ අරමුණ වී ඇත්තේ, කර්මාන්ත සහ ආහාර සඳහා භාවිත කරන ලුණු උසස් තත්ත්වයෙන් සාධාරණ මිලක් යටතේ වෙළඳපොළට නිකුත් කිරීමට අවශ්‍ය මැදිහත්වීම සිදුකිරීමයි.

වෙළඳපොලේ අලෙවියට ඇති ලුණු මිල ගණන් සම්බන්ධව අධිකාරිය මගින් සිදුකරන ලද මිල සමීක්ෂණයන්ට අනුව, පසුගිය කාලසීමාව තුල විවිධ මිල ගණන් යටතේ ලුණු අලෙවි වීමත්, කාලීනව ඇතිවූ ලුණු හිඟය සහ කර්මාන්තය මුහුණදෙන ගැටලු සම්බන්ධවත් මෙහිදී සාකච්ඡාවට ලක්ව තිබෙනවා.

රජයේ සහ ප්‍රමුඛපෙලේ ලුණු නිෂ්පාදකයින් ඇතුළු ආයතන 18ක් සමග සිදුකළ මෙම සාකච්ඡාවේදී දැනට පවතින වෙළදපොළ තත්ත්වය මත පාරිභෝගිකයා අපහසුතාවට ලක් නොවන පරිදි මිල ගණන් පවත්වාගෙන යාම කෙරෙහි වැඩි අවධානයක් යොමුව ඇති බව සඳහන්. 

ඉදිරියේදී දේශීයව නිෂ්පාදනය වන ලුණු වෙ‍ෙළඳපොළට පැමිණීමට නියමිත බැවින් මාර්තු මස අග වන විට ඉතාමත් තරගකාරී මිලකට එම ලුණු අලෙවි විය හැකි බව නිෂ්පාදකයන් විශ්වාසය පළ කළ අතර, එතෙක් තවදුරටත් මිල ඉහල යාමකින් තොරව මිල ස්ථාවරව පැවතිය යුතු බවට අධිකාරිය සිදුකරන ලද ඉල්ලීමට ඔවුන් මෙහිදී එකඟතාවය පළ කර තිබෙනවා.