යුක්‍රේන ජනාධිපති ව්ලොදිමීර් සෙලෙන්ස්කි, අමෙරිකානු ජනාධිපති ඩොනල්ඩ් ට්‍රම්ප් පසුයිය සිකුරාදා දිනයේ දී වොෂිංටන්හි දී හමුවකට එක් විය. එහි ප්‍රධාන අරමුණ වූයේ දෙරට අතර ඛනිජ සම්පත් බෙදාගැනීම පිළිබඳව ගිවිසුමකට එළඹීමයි. එමෙන් ම රුසියාවෙන් සිය රටට එල්ල වන ආක්‍රමණ සම්බන්ධයෙන් සහතිකයක් ලබා දෙන ලෙසට යුක්‍රේන ජනාධිපතිවරයා විසින් අමෙරිකානු ජනාධිපතිවරගෙන් ඉල්ලීමක් කර ඇති බව ද වාර්තා වුණි. කෙසේ වෙතත් විදෙස් මාධ්‍යවලට අනුව ඒ සම්බන්ධයෙන් අමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කර තිබුණේ එවන් සහතිකයක් අමෙරිකාවට ලබාදිය නොහැකි බවත් අතර එහි වගකීම යුරෝපය දැරිය යුතු බවත් ය.
යුක්‍රේනයේ විරල ඛනිජ ලබා ගැනීමේ ගිවිසුමකට එළැඹීමට ට්‍රම්ප් පරිපාලනය පියවර ගත්තේ අමෙරිකාව යුක්‍රේන යුද්ධය වෙනුවෙන් වැය කළ මුදල නැවත ලබාගැනීමේ අරමුණින් බව නොරහසකි. ආරම්භයේ දී එම ගිවිසුමට එළැඹීමට යුක්‍රේනය ප්‍රතික්ෂේප කළත් සංශෝධන කිහිපයකින් පසුව ඊට එකඟ වීමට යුක්‍රේනය තීරණය කර ඇතැයි විදෙස් වාර්තා කළේ ය. ඒ යුක්‍රේනය ඉදිරිපත් කළ ඉල්ලීම් කිහිපයකට අමෙරිකාව අනුමැතිය පළ කිරීමෙන් පසුවයි. නමුත් යුක්‍රේන ජනාධිපතිගේ මුඛ්‍යත ම අරමුණ වන්නේ යුක්‍රේනයේ ආරක්ෂාව තහවුරු කරගැනීමයි. විදෙස් වාර්තා අනුව එම ඉල්ලීමට අමෙරිකාව එකඟ වී නොමැත.
මේ වන විට යුක්‍රේන ජනාධිපති වොලොදිමීර් සෙලෙන්ස්කිගේ අමෙරිකානු සංචාරය, ලොව පුරා අවධානයට ලක්ව තිබේ. ඒ යුක්‍රේන ජනාධිපති වොලොදිමීර් සෙලෙන්ස්කි සහ අමෙරිකානු ජනාධිපති ඩොනල්ඩ් ට්‍රම්ප් අතර ධවල මන්දිරයේ දී පැවති හමුව උණුසුම් වචන හුවමාරුවකින් අවසන් වීමත් සමගිනි. රුසියා - යුක්‍රේන යුද්ධය සම්බන්ධයෙන් සාකච්ඡා වූ අවස්ථාවේ ජනාධිපතිවරුන් දෙපළ අතර මෙම උණුසුම් වචන හුවමාරුව සිදුව තිබූ අතර එය ලෝක මාධ්‍ය වෙත ද විවෘත වීම විශේෂත්වයකි.
යුද්ධය ආරම්භ කිරීමට මූලික වූ රුසියානු ජනාධිපති ව්ලැද්මීර් පුටින්ට සහය නොදක්වන ලෙස අමෙරිකානු ජනාධිපතිවරයාගෙන් ඉල්ලීමක් සිදු කිරීම, යුක්‍රේන ජනාධිපතිවරයාගේ අරමුණ වී තිබුණ ද ඒ සම්බන්ධයෙන් ඇති වූ සාකච්ඡාවේ දී ට්‍රම්ප් ජනාධිපතිවරයාට සහ එරට උප ජනාධිපති ජේඩී වාන්ස් හට අගෞරව වන ආකාරයේ ප්‍රකාශ සිදු කළ බවට ඔවුන් විසින් යුක්‍රේන ජනාධිපතිවරයාට චෝදනා කර තිබුණි. ඇති වූ තත්ත්වයත් සමග යුක්‍රේන ජනාධිපතිවරයාට ධවල මන්දිරයෙන් පිටව යන ලෙස ද දැනුම් දීමක් සිදු කර ඇති බව විදෙස් මාධ්‍ය වාර්තා කළේය.
සාකච්ඡාවෙන් පසු අදහස් දක්වමින් අමෙරිකානු ජනාධිපති ඩොනල්ඩ් ට්‍රම්ප් සඳහන් කර ඇත්තේ යුධ ගැටුම් අවසන් කර සාමය ඇති කිරීම සඳහා යුක්‍රේන ජනාධිපතිවරයාගේ කැමැත්තක් නොමැති අතර මිලියන ගණනක ජනතාවගේ ජීවිත පිළිබඳව ද ඔහුට තැකීමක් නොමැති බවය. මේ අතර රාජ්‍ය නායකයින් දෙපළක් අතර ධවල මන්දිරයේ පැවති සාකච්ඡාවක් මෙලෙස උණුසුම් හා මතභේදකාරී ලෙස පැවැත්වෙන ආකාරය දුටු පළමු අවස්ථාව මෙය බව එය ආවරණය කළ මාධ්‍යවේදීන් සඳහන් කර තිබුණි.
බ්‍රිතාන්‍ය ප්‍රංශය ඇතුළු රටවල් රැසක රාජ්‍ය නායකයින්ගේ අවධානය ද මේ සම්බන්ධයෙන් යොමුව තිබූ අතර බ්‍රිතාන්‍ය අග්‍රාමාත්‍ය කීර් ස්ටාමර් විසින් අමෙරිකා හා යුක්‍රේන ජනාධිපතිවරුන් දෙපළ සමග ම ඒ සම්බන්ධයෙන් සාකච්ඡා කර ඇති බව ද විදෙස් මාධ්‍ය වාර්තා කර තිබුණි.
මේ අතර තමා සහ ට්‍රම්ප් ජනාධිපතිවරයා අතර ඇති වූ මතභේදකාරී තත්ත්වය දෙපාර්ශවයට ම යහපත් තත්ත්වයක් නොවන බවට පිළිගන්නා නමුත් දෙරට අතර සබදතා තවදුරටත් පවත්වාගෙන යාමට එය බාධාවක් නොවනු ඇති බවට අපේක්ෂා කරන බව විදෙස් මාධ්‍යයක් වෙත අදහස් දක්වමින් යුක්‍රේන ජනාධිපති වොලොදිමීර් සෙලෙන්ස්කි ප්‍රකාශ කර සිටියේය.
මේ අතර මෙම උණුසුම් වචන හුවමාරුවෙන් පසුව යුරෝපා නායකයින් රැසක් යුක්‍රේන ජනාධිපති වොලොදිමීර් සෙලෙන්ස්කි හට සහය පළ කරමින් අදහස් දක්වා ඇත. ප්‍රංශ ජනාධිපති එමානුවෙල් මැක්‍රෝන් ප්‍රකාශ කර ඇත්තේ යුක්‍රේනයට සහය පළ කරමින් රුසියාවට සම්බාධක පැනවීමට මීට වසර 03කට පෙර තම රට ගත් තීරණය තව දුරටත් එලෙස ම අනුගමනය කරන බව ය. යුක්‍රේනයට ජර්මනිය හා යුරෝපා සංගමය මත විශ්වාසය තැබිය හැකි බව ජර්මානු චාන්සලර් ඕලාෆ් ස්කොල්ස් ප්‍රකාශ කර ඇති අතර ඉතාලි අග්‍රාමාත්‍ය ජෝර්ජියා මෙලෝනි සඳහන් කර ඇත්තේ යුක්‍රේන යුද්ධය පිළිබඳ සාකච්ඡා කිරීම සදහා අමෙරිකාව, යුරෝපය හා ඊට සම්බන්ධ පාර්ශ්ව අතර හදිසි සමුළුවක් කැදවිය යුතු බව ය. යුක්‍රේනයට අඛණ්ඩව සහය ලබා දෙන බවට සහතික වී ඇති බ්‍රිතාන්‍ය අග්‍රාමාත්‍ය කීර් ස්ටාමර්, කල්පවතින සාමයක් ළඟා කර ගැනීම සදහා හැකි සෑම සහයෝගයක් ම ලබා දෙන බව ප්‍රකාශ කර ඇත.
මෙවැනි තත්ත්වයක් මත අමරිකාව කුමන ආකාරයේ තීරණයක් යුක්‍රේනය සම්බන්ධව ගනි දැයි ලොව ම දෑස් විවරව බලා සිටින අතර මෙම සිදුවීම රටවල් අතර පවතින සබඳතා වෙනම ම දිශානතියකට ගෙන යාවිදැයි යන කුතුහලය ලෝකය කෙරෙහි සවිඥානික ප්‍රේක්ෂක - ශ්‍රාවකයන්ට පවති.
සැකසුම හා සංස්කරණය - ප්‍රසිලා සඳරුවනි
-w_200.jpg)
-w_200.jpg)
