මාර්තු 6 වන දින එනම් ඊයේ දින විකාශය වූ අල් ජසීරා ඉංග්‍රීසි නාලිකාවේ 'හෙඩ් ටු හෙඩ්' වැඩසටහන සඳහා පැවති සම්මුඛ සාකච්ඡාව සඳහා ශ්‍රී ලංකා හිටපු ජනාධිපති එමෙන් ම හය වතාවක් අගමැති ධුරය හෙබ වූ රනිල් වික්‍රමසිංහ එක්ව තිබුණි. මෙම සාකච්ඡාව මෙහෙයවන ලද්දේ බ්‍රිතාන්‍ය–ඇමරිකානු මාධ්‍යවේදියෙකු වූ මෙහ්දි රාසා හසන් විසිනි. අවුරුදු 45ක් වයසැති මෙහ්දි රාසා හසන් කලක් අල්ජසීරා සමඟ කටයුතු කර ඇති අතර ඔහු ඉන් ඉවත්ව ගොස් යලිත් ඒ සමඟ එක් වී ඇත්තේ 2024 ජුනි මාසයේ දී ය. ඒ Head to Head වැඩසටහන මෙහෙයවන්නා ලෙසයි.

මේ වන විට එම වැඩසටහන තුළ හිටපු ජනාධිපතිගේ කතා බහ සමාජ මාධ්‍යයේ මෙන් ම සාමාන්‍ය ජනයා අතර ද මහත් ආන්දෝලනාත්මක කතිකාවතක් ගොඩ නගා ඇත. එසේ උණුසුම් වූ සම්මුඛ සාකච්ඡාව පහතින් දැක්වේ.

ප්‍රශ්නය - පාර්ලිමේන්තුව විසින් ඔබ ශ්‍රී ලංකාවේ ජනාධිපතිවරයා ලෙස පත් කළා. ඔබ ආර්ථිකය ස්ථාවරත්වයකට ගෙන ආවා. ඔබ රටේ 70%ක උද්ධමනය 1.3%ක් දක්වා පහළට ගෙන ආවා වසරක් තුළ දී. නමුත් ඔබ පසුගිය සැප්තැම්බරයේ පැවති ජනාධිපතිවරණයේ පරාජයට පත්වුණා. ඒ තරම් හොඳ වාර්තාවක් තැබූ ඔබ ශ්‍රී ලාංකික ජනතාව විසින් මුළුමනින් ම ප්‍රතික්ෂේප කිරීම ගැන ඔබට මොනවද හිතෙන්නේ?

පිළිතුර - මම පරාජය වුණේ මොකද කියලා පැහැදිලි කරන්න මට මෙතනට ආවේ නැහැ. නමුත් මම සතුටු වෙනවා මට පැවරුණු කාර්යය ඉටුකිරීමට හැකිවීම ගැන.

ප්‍රශ්නය - 2022 වසරේ ඔබ බලයට පැමිණ පැය කිහිපයකින් ඔබ ආරක්ෂක හමුදා අමතලා නීතිය හා සාමය ඇති කරන්න ඕනෑ ම දෙයක් කරන්න කියලා ඔවුන්ට උපදෙස් දුන්නා නේද? ඊළඟට ඔවුන් ප්‍රචණ්ඩකාරී අන්දමින් විරෝධතාකරුවන් මර්දනය කළා නේද?

පිළිතුර - කවුරුවත් තරුණ පෙළේ අදහස් නොසලකා හැරියේ නැහැ. පාර්ලිමේන්තුව විසින් ජනාධිපතිවරයා ලෙස මා පත් කළ විට මම නීතිය හා සාමය ස්ථාපිත කළ යුතු වනවා. පාර්ලිමේන්තුව කැරලිකරුවන් විසින් අත්පත් කරගත්තොත් කවර තත්ත්වයක්ද උදාවෙන්නේ. එය ප්‍රජාතන්ත්‍රවාදී ද?

ප්‍රශ්නය - ජාත්‍යන්තර ක්ෂමා ආයතනය ප්‍රකාශ කරන විදියට පොලිසිය විසින් විරෝධතාකරුවන්ට එරෙහිව ඔබේ කාර්යාලය ඉදිරිපිට කඳුළු ගෑස් කැනිස්ටර් 944ක් පාවිච්චි කර තියෙනවා?

පිළිතුර - ජාත්‍යන්තර ක්ෂමා ආයතනය අපේ රටවල් අපකීර්තියට පත්කරනවා. මොකද ඔවුන් වෙනස් ආකාරයක අදහස් දරන අය.

ප්‍රශ්නය - යුරෝපා සංගමය කියනවා සාමකාමී විරෝධතාකරුවන්ට එරෙහිව අනවශ්‍ය විදියට බලය යෙදවීමක් සිදු වී ඇති බව.

පිළිතුර - යුරෝපා සංගමය ඇතැම් රාජ්‍යයන් නොවන සංවිධානවලට මූල්‍යාධාර සපයා තිබෙනවා. ඔවුන් මට ඉල්ලා අස්වන ලෙසත් බල කළා. ඔවුන් ම තමයි ශ්‍රී ලංකාව ආර්ථික අර්බුදයෙන් මුදාගත් බවට මට ප්‍රශංසා පළ කරන්නේ.

ප්‍රශ්නය - ඔබ යුරෝපා සංගමයට කැමති නැහැ. ජාත්‍යන්තර ක්ෂමා සංවිධානයටත් කැමති නැහැ. එක්සත් ජාතීන්ගේ මානව හිමිකම් කොමිසමටත් විරුද්ධයි.

පිළිතුර - නැහැ. මම යුරෝපා සංගමයට කැමතියි. ඔබට මට ආයතන ගැන කියන්න තියෙන හැමදෙයක් ම කියන්න. ඊළඟට මම උත්තර දෙන්නම්. මම දේශපාලනයේ ඉන්නේ ඔබ ඉපදෙන්නත් කලින් ඉඳලා.

ප්‍රශ්නය - කතෝලික පල්ලියේ ප්‍රධානියා වන කාදිනල් මැල්කම් රංජිත් හිමිපාණන් කියනවා ඔබ පාස්කු ප්‍රහාරයේ සැබෑ විමර්ශනයක් කරන්න උත්සාහ නොගත් බව. ඔබ ඒ සඳහා පත්කළ කොමිසම ඵලක් නැති වාර්තාවක් නිකුත් කළ බවයි ඔහු කිව්වේ.

පිළිතුර - මම දන්නවා කතෝලික පල්ලියේ දේශපාලනයක් පවතින බව.

මෙසේ සිදු කළ සාකච්ඡාවේ දී බටලන්ද කොමිසම පිළිබඳව ද ප්‍රශ්න කිරීම් සිදු වන අතර ඒ සඳහා ලබා දුන් පිළිතුරු හා ප්‍රතිචාර සමාජ මාධ්‍ය කළඹා ඇති අයුරු දැක ගත හැක. එමෙන් ම පාස්කු ප්‍රහාරය පිළිබඳව දක්වා ඇති ප්‍රතිචාර ද එතරම් සතුටු දායක නොවන අතර කතෝලික පාර්ශවයෙන් මේ සඳහා කුමන ආකාරයේ ප්‍රතිචාරයක් ගෙන ඒවි දැයි මුලු ලොවක් බලා සිටියි.

ඒ කෙසේ නමුත් අල්ජසීරා නාලිකාවට ලබාදුන් සම්මුඛ සාකච්ඡාව සම්බන්ධයෙන් හිටපු ජනාධිපති රනිල් වික්‍රමසිංහ ඊයේ දින පස්වරුවේ ප්‍රවෘත්ති සාකච්ඡාවක් පවත්වමින් ප්‍රතිචාර දක්වා තිබුණි. "අල්ජසීරා නාලිකාවේ සාකච්ඡාව අපේ වගේ නෙමෙයි. අපේ සජීවීව අරගෙන සියල්ල ම දානවා. හොඳයි නරකයි දෙක ම. අල්ජසීරා පැය 2ක් විතර අරගෙන පැයයි දාලා තියෙන්නේ. සමහර හොඳ ඒවා තිබුණා. දාලා නැහැ. ඔක්කො ම දැම්මා නම් තත්ත්වය මීට වඩා වෙනස්."

මෙරට ආගමික නායකයා ලෙස පිළිගනු ලබන්නේ කාදිනල් හිමිවත් වෙන කිසිවකුත් නොව මල්වතු නාහිමියන් බවට තමා සිදුකළ ප්‍රකාශය “අල් ජසීරා“ රූපවාහිනී සේවය සමග කරන ලද සම්මුඛ සාකච්ඡාවේ ප්‍රචාරය කර නැතැයි හිටපු ජනාධිපති රනිල් වික්‍රමසිංහ පැවසීය.

“මේ සම්මුඛ සාකච්ඡාවේදී මම කරපු සමහර හොඳ කතා තිබුණා ඒවා දාලා නෑ. ඒ ඔක්කොම ප්‍රචාරය කරා නම් මීට වඩා වෙනස් තත්ත්වයක් තියේවි. එම සාකච්ඡාවේදී මට නම් තුනක් දුන්නා. අම්බ්‍රිකා සත්‍යනාදන් මැතිනිය මෙහි හිටියේ. මම එතුමිය එයි කියලා මම බලාපොරොත්තු වුණා. පස්සේ ලබාදුන්නේ රාසරත්නම් නමැති කාන්තාවක්. ඇයගේ ස්වාමි පුරුෂයා ඇන්ටන් බාලසිංහම්ගේ උපදෙස් දුන්නු පුද්ගලයෙක්. ඇත්ත වශයෙන්ම එල්.ටී.ටී.ඊ. එකේ හිටපු දෙන්නෙක් දාලා හිටියා.

මේ රටේ බහුතරයක් ඉන්නේ බෞද්ධයෝ. අපේ බෞද්ධයන්ගේ ප්‍රධානියා මල්වතු නාහිමියන්. අනෙක් ආගමික නායකයන් කාදිනල්ලා වෙන්න පුළුවන්, බිෂොප්ලා වෙන්න පුළුවන් ඔවුන් ඉන්නේ ඒ යටතේයි. මොකක් හරි හේතුවකට එය පළවුණේ නෑ” යැයිද හිටපු ජනාධිපතිවරයා පැවසීය.

එය එසේ වුවද හිටපු ජනපතිගේ මෙම සංවාදයන් රටේ දේශපාලනික මෙන් ම ආගමික පැතිකඩයක් සසල කර ඇති අතර ඉදිරියේ දී ඔහුගේ මෙම ප්‍රකාශයන් සම්බන්ධව කිනම් ප්‍රතිචාරයන් ගෝලීය වශයෙන් එල්ල වේවිදැයි අවිනිශ්චිත ය. මන්ද ඔහු සිදු කර ඇති චෝදනාවන් හා ප්‍රකාශ සුළුපටු ඒවා නොවන බැවිනි.

සැකසුම හා සංස්කරණය - ප්‍රසිලා සඳරුවනි