අනුරාධපුර ශික්ෂණ රෝහලේ විශේෂඥ වෛද්‍යවරියක් ලෙස පුහුණු වන වෛද්‍යවරියක සිය නිල නිවාසය තුළදී දූෂණය කළ බවට සැක පුද්ගලයා අද පෙරවරුවේ අත්අඩංගුවට ගනු ලැබුවා.

පොලීසිය පැවසූවේ සැකකරු අද උදෑසන ගල්නෑව ප්‍රදේශයේදී අත්අඩංගුවට ගත් බවයි.

ඔහු සොයා පොලිස් කණ්ඩායම් පහක් මඟින් විශේෂ මෙහෙයුමක් ක්‍රියාත්මක කළ අතර එහිදී අනාවරණ වූ කරුණු මත සැකකරු අත්අඩංගුවට ගෙන තිබුණා. 

33 හැවිරිදි සැකකරු ගල්නෑව ප්‍රදේශයේම පදිංචිකරුවෙකු වන අතර, ඔහු මීට පෙරත් අපරාධ කිහිපයකට සම්බන්ධ අයෙක්.

මෙම සිදුවීම මුල් කර ගනිමින් සෞඛ්‍ය සේවකයන්ගේ ආරක්ෂාව තහවුරු කරන ලෙස ඉල්ලා අනුරාධපුර ශික්ෂණ රෝහලේ වෛද්‍යවරු ඇතුළු සියලු සෞඛ්‍ය කාර්යමණ්ඩල අද පෙරවරුවේ සංකේත වර්ජනයක්ද ආරම්භ කළා.