පසු ගිය සතියේ රනිල් වික්‍රමසිංහ හා අල්ජසීරා මාධ්‍ය නාලිකාවෙන් පැවැති සාකච්ඡාව පිළිබඳව Global Eye විශේෂාංගය මගින් අප වාර්තා කළ අතර එම සාකච්ඡාවේ දී ඉස්මතුව ආ බටලන්ද කොමිසමේ වාර්තාව පිළිබඳව පසුගිය සතිය මුලුල්ලේ ම රට පුරා කතිකාවකට ලක් විය. විවිධ දේශපාලන පක්ෂ මගින් මෙය නැවත පාර්ලිමේන්තුවට ඉදිරිපත් කළ යුතු වාර්තාවක් ලෙස ප්‍රකාශ කිරීම මෙන් ම මෙම තහවුරු වීම් සමඟ එම වාර්තාව පාර්ලිමේන්තු සාකච්ඡාවට ලක් කිරීමට අප්‍රේල් 10 වන දිනයට නියමිත කිරීම අද දින සිදු වුණි. ඒ අතර ම හිටපු ජනපති රනිල් වික්‍රමසිංහ අද දිනයේ මෙම බටලන්ද වාර්තාව පිළිබඳව විශේෂ ප්‍රකාශයක් සිදු කළේ ය. මෙම ප්‍රකාශය මගින් ඔහු පෙන්වා දෙන්නේ 88-90 කාලවල දී ජනතා විමුක්ති පෙරමුණ විසින් සිදු කළ දරුණු ත්‍රස්තවාදී ක්‍රියා සම්බන්ධව එම කොමිෂන් සභා වාර්තාවේ දැක්වෙන බවයි. පහතින් දැක්වෙනුයේ ඔහු අද දින නිකුත් කළ එම විශේෂ ප්‍රකාශයයි. 

"ඉන්දු ලංකා ගිවිසුම අත්සන් කිරීමේන් පසුව ජනතා විමුක්ති පෙරමුණ රට පුරා භීෂණයක් ඇති කිරීමට ඇති කිරීමට කටයුතු කරනු ලැබුවා. ඒ අවස්ථාවේ රටේ මර්මස්ථාන ආරක්ෂා කිරීමේ බලය ජේ. ආර් ජයවර්ධන මැතිතුමා විසින් කැබිනට් ඇමතිවරුන්ට පැවරුවා. බියගම ප්‍රදේශයේ තෙල් පිරිපහදුව, ඩීසල් බලාගාරය, මහවැලියේ සිට කොළඹට විදුලි බලය ලබා දෙන මධ්‍යස්ථානය, වෙළඳ කලාපය ලෙස ආර්ථික වශයෙන් වැදගත් ස්ථාන කිහිපයක් තිබුණා. එම ප්‍රදේශයේ ආරක්ෂාව තහවුරු කිරීම සඳහා හමුදාව කැඳවණු ලැබුවා.

ආරක්ෂක අංශවලට රැඳි සිටීම සඳහා ලංකා පොහොර නිපදවීමේ සමාගමට අයත් ඒ වන විට අතහැර දමා තිබූ ගොඩනැගිලි සහ නිවාස කිහිපයක් ලබා දීමට තීරණය කෙරුණි. ඒ වනවිටත් ලංකා විදුලි බල මණ්ඩලයේ නිලධාරීන් කිහිප දෙනෙකු එම නිවාස කිහිපයක පදිංචිව සිටියා. මේ භීෂණ කාලය තුළ දී සපුගස්කන්ද පොලිස් ස්ථානයේ ස්ථානාධිපතිවරයා මරා දැමුවා. ඒ අවස්ථාවේ දී ආරක්ෂක නියෝජ්‍ය ඇමති රංජන් විජේරත්න මහතා මට කතා කර යුද හමුදා සහ පොලිස් නිලධාරීන්ගේ ආරක්ෂාව සම්බන්ධව නිවාස සංකීරණයේ හිස්ව පැවැති නිවාස ඔවුනට ලබා දෙන ලෙස ඉල්ලා සිටියා. 

ඒ අනුව එවකට ඈවරකරු මගින් අදාළ නිවාස කැළණි පොලිස් අධිකාරී නලීන් දෙල්ගොඩ මහතා වෙත පැවරීමට පියවර ගත්තා. පළාත් සභා මන්ත්‍රීවරයෙකු, සමූපකාර සභා මන්ත්‍රීවරයෙකු, පොලිස් සාජන්වරයෙකු ඇතුළු කීප දෙනෙකු ඝාතනය කිරීම මේ අතරවාරයේ දී සිදු වුණා. ඒ සමග තවත් පළාත් සභා මන්ත්‍රීවරයෙකුගේ නිවසට පහරදීමක් සිදුවුණා.

කඩා වැටුණු ජන ජීවිතය, ආර්ථිකය ගොඩනගමින් රටේ සාමය සහ ජාතික ආරක්ෂාව සහතික කිරීමට බලයේ සිටි ආණ්ඩුව විසින් කටයුතු කළා. 1994න් පසුව චන්ද්‍රිකා බණ්ඩාරනාක කුමාරතුංග මහත්මිය බටලන්ද ප්‍රදේශයේ වදකාගාරයක් තිබේදැයි සෙවීමට කොමිසමක් දැම්මා. ඊට නොයෙකුත් පුද්ගලයින් කැඳෙව්වා. මාව මෙහි කැඳෙව්වේ සාක්කිකරුවෙක් ලෙස පමණයි. ඒ වනවිට මම රටේ විපක්ෂ නායකවරයා ලෙස කටයුතු කළා. 

බටලන්ද කොමිසම පත් කළේ සම්පූර්ණ දේශපාලන මඩ ගැසීමක් අරමුණු කරගෙනයි. නමුත් එම උත්සාහය සාර්ථක වුණේ නෑ. වාර්තාවේ තීරණවල මා සම්බන්ධයෙන් සඳහන් කර තිබෙන්නේ ඇමති හැටියට පොලිස් අධිකාරී මගින් පොලිස් නිලධාරීන්ට නිවාස ලබා දීම නිවැරදි නොවන බවයි. එහි නියම ක්‍රමවේදය විය යුත්තේ පොලිස්පතිවරයාට නිවාස භාරදී අදාළ නිලධාරීන්ට පැවරීමයි. 

මේ ක්‍රියාකාරීකම නිසා මමත් නලීන් දෙල්ගොඩ මහතාත් වක්‍රාකාරයෙන් වගකිව යුතු බව කොමිෂන් සභා වාර්තාවේ සඳහන් වෙනවා. කොමිෂන් සභාවේ වාර්තාවේ සඳහන් වන වෙනත් කිසිදු කරුණක් මට අදාළ වෙන්නේ නෑ. 

ජනතා විමුක්ති පෙරමුණ 1988-90 කාලයේදී කළ ත්‍රස්තවාදී ක්‍රියා රාශියක් ගැන කොමිෂන් වාර්තාවේ තීරණ සභාපති නිරීක්ෂණවලට දැක්වෙනවා. එහි පසුබිමත් කියනවා. ජනතා විමුක්ති පෙරමුණ කළ දරුණු ත්‍රස්තවාදී ක්‍රියා ගැන කොමිෂන් සභා වාර්තාවේ 03 වැනි පරිච්ඡේදයේ දීර්ඝ වශයෙන් කරුණු සඳහන් වෙනවා. මුළු ඉතිහාසය ම එහි ඇතුළත් කර තිබෙනවා. ඉහත කරුණු ඇරෙන්න අනෙක් කිසිම චෝදනාවක් මට අදාළ වන්නේ නෑ. ඒ වාර්තාව මම සම්පූර්ණයෙන් ම ප්‍රතික්ෂේප කරනවා.

බටලන්ද කොමිෂන් වාර්තාව හංගාගෙන සිටියා කියා කිසිවෙකුටවත් චෝදනා කළ නොහැකියි. වර්ෂ 2000 දී පාර්ලිමේන්තු සැසිවාරයක් හැටියට එය තිබුණා. නමුත් කිසිවෙකුත් එය විවාද කිරීමට ඉල්ලීමක් කළේ නෑ. අඩු ම තරමේ ජනතා විමුක්ති පෙරමුණවත් එවැනි ඉල්ලීමක් කළේ නෑ. බොහෝ දෙනක් වාර්තාව පිළිගත්තෙත් නෑ. ඒ නිසා පාර්ලිමේන්තුවේ දී විවාද කිරීමට පියවර නොගත් බව අපට විශ්වාස කළ හැකියි. 

බලයට පත්වූ කිසිදු දේශපාලන පක්ෂයක් මේ වාර්තාව හරහා පටු දේශපාලන වාසි ලබා ගැනීමට කටයුතු නොකළ බවද කිව යුතුයි. ඒ වගේම පාර්ලිමේන්තු සැසි වාර්තාවක් අවුරුදු 25කින් පසුව පාර්ලිමේන්තුවේ විවාද කිරීමේ කිසිම සම්ප්‍රදායක් මේ රටේ හෝ අනෙක් පාර්ලිමේන්තුවලවත් නැහැ."

කෙසේ නමුත් බටලන්ද නිවාස සංකීර්ණයේ නීතිවිරෝධී ලෙස රඳවා ගැනීමේ ස්ථාන, වධකාගාර පිහිටුවීම සහ පවත්වාගෙන යාම පිළිබඳ පරීක්ෂණ කොමිසන් සභාවේ වාර්තාව සභානායක බිමල් රත්නායක අමාත්‍යවරයා විසින් පසුගිය 14 වැනිදා පාර්ලිමේන්තුවේ සභාගත කළ අතර ඒ සඳහා දෙදින විවාදයක් පවත්වන බව එහි දී ප්‍රකාශ ක‍රන ලදි. ඒ අනුව කථානායක ජගත් වික්‍රමරත්න මහතාගේ ප්‍රධානත්වයෙන් ඊයේ රැස්වූ පාර්ලිමේන්තු කටයුතු පිළිබඳ කාරක සභාවේ දී විවාදයේ පළමු දිනය අප්‍රේල් මස 10 වැනිදා පෙරවරු 11.30 සිට පස්වරු 5.30 දක්වා පැවැත්වීමට තීරණය කර ඇති බව පාර්ලිමේන්තු මහලේකම් කුෂාණි රෝහණධීර මහත්මිය අද දින ප්‍රකාශ කළා ය. විවාදයේ දෙවන දිනය සඳහා මැයි මාසයේ දිනයක් යොදාගැනීමට නියමිත බව ද වාර්තා වෙයි.

මෙම විවාදයෙන් අනතුරුව කුමන තීන්දුවක් ඉදිරිපත් වේද යන්න අවිනිශ්චිත අතර මෙම වාර්තාව පිළිබඳව ඉදිරියේ දී රජය කුමන ආකාරයේ තීන්දු තීරණ ගනු ඇත්දැයි රට ම අවදියෙන් බලා සිටියි. එමෙන් ම පෙරටුගාමි සමාජවාදි පක්ෂය ප්‍රකාශ කර සිටින්නේ ආරම්භක ක්‍රියාමාර්ගයක් ලෙස රනිල් වික්‍රමසිංහගේ ප්‍රජා අයිතිය අහෝසි කිරීමට කටයුතු කළ යුතු බවයි. එමෙන් ම නඩු පැවරීම හා අත්තඩංගුවට ගැනීමට ද ක්‍රියා මාර්ග ගත යුතු බවයි. නීති විශාරදයින් පවසා සිටින්නේ බටලන්ද වාර්තාවේ නිර්දේශ සම්බන්ධයෙන් නීතිපති උපදෙස් මත නඩු පැවරිය හැකි බවයි. රටේ සාමාන්‍ය ජනයා තුළ ද ඇත්තේ වරදකරුවන්ට නිසි දඩුවම් ලබා දීමට රජය කටයුතු කළ යුතු බවයි. කෙසේ නමුත් අප්‍රේල් 10 වන දින දක්වා විවාදයේ ප්‍රතිඵල පැමිණෙන තෙක් බලා සිටීමට අපට සිදු වනු ඇත. 

සැකසුම හා සංස්කරනණය - ප්‍රසිලා සඳරුවනි