පොලිස්පති ධුරයේ වැඩ අත්හිටුවන ලද දේශබන්දු තෙන්නකෝන් මහතා දින 19කට පසුව මාතර මහේස්ත්‍රාත් අධිකරණයට සිය නීතීඥවරුන් සමග පැමිණ අද උදෑසන භාරවුණා. 

2023 වසරේ මාතර - වැලිගමදී සිදුවූ වෙඩි තැබීමක් අතරතුර කොළඹ අපරාධ කොට්ඨාසයේ පොලිස් සැරයන්වරයෙක් මියයාමේ සිද්ධිය සම්බන්ධයෙන්, එවකට වැඩබලන පොලිස්පති දේශබන්දු තෙන්නකෝන් මහතා ඇතුළු පොලිස් නිලධාරින් 08 දෙනෙකු අත්අඩංගුවට ගන්නා ලෙස මාතර මහේස්ත්‍රාත්වරයා පසුගිය පෙබරවාරි‍ 27 වැනිදා නියෝග කළා.

අනතුරුව තමා අත්අඩංගුවට ගැනීමට මාතර මහේස්ත්‍රාත් අධිකරණය නිකුත් කළ නියෝගය අත්හිටුවීමේ අතුරු තහනම් නියෝගයක් ඉල්ලා තෙන්නකොන් මහතා අභියාචනාධිකරණයට රිට් පෙත්සමක් ගොනුකළ අතර එය ඉකුත් 12 වනදා සලකා බැලුවා.

ඒ අනුව අදාළ පෙත්සමේ තීන්දුව පසුගිය සඳුදා ප්‍රකාශයට පත්කෙරුණු අතර එය විභාගයට නොගෙන මුල් අවස්ථාවේදීම නිශ්ප්‍රභ කිරීමට අභියාචනාධිකරණය තීන්දු කළා.

එමෙන්ම දේශබන්දු තෙන්නකෝන් මහතා වහාම අත්අඩංගුවට ගෙන අධිකරණයට ඉදිරිපත් කරන ලෙසට අභියාචනාධිකරණය අපරාධ පරීක්ෂණ දෙපාර්තමේන්තුවට නියෝග කරනු ලැබුවා.

එවන් පපසුබිමක අද පෙරවරුවේ මාතර මහේස්ත්‍රාත් අධිකරණයට ඉදිරිපත් වූ පොලිස්පති දේශබන්දු තෙන්නකෝන් මහතා හෙට දිනය දක්වා රක්ෂිත බන්ධනාගාරගත කිරීමටයි නියෝග කෙරුණේ.