පාර්ලිමේන්තුවේදී සම්මත කරන ලද 2025 මුදල් වර්ෂය සඳහා වන විසර්ජන පනත් කෙටුම්පත සඳහා කථානායකවරයා සිය සහතිකය සටහන් කර තිබෙනවා. 

ඒ අනුව මෙම විසර්ජන පනත් කෙටුම්පත 2025 අංක 03 දරණ විසර්ජන පනත ලෙස බලාත්මක වන බව පාර්ලිමේන්තු කටයුතු මහලේකම් කාර්යාලය පවසනවා. 

2025 වසර සඳහා වන විසර්ජන පනත් කෙටුම්පත දෙවැනිවර කියවීම හෙවත් අයවැය කථාව මුදල් අමාත්‍යවරයා ලෙස ජනාධිපති අනුර කුමාර දිසානායක මහාත විසින් පසුගිය පෙබරවාරි මස 17 වැනි දින පාර්ලිමේන්තුවට ඉදිරිපත් කළා. 

අනතුරුව පෙබරවාරි 18 වැනිදා සිට 25 වැනිදා දක්වා දින 7ක් විසර්ජන පනත් කෙටුම්පත දෙවැනි වර කියවීමේ විවාදය පැවැති අතර පෙබරවාරි 25 වැනි දින විසර්ජනය පනත් කෙටුම්පත දෙවැනිවර කියවීම වැඩි ඡන්ද 109කින් පාර්ලිමේන්තුවේදී සම්මත වුණා. 

අනතුරුව විසර්ජන පනත් කෙටුම්පතට අදාළ කාරක සභා අවස්ථා විවාදය පෙබරවාරි 27 වැනි දින සිට මාර්තු 21 වැනිදා දක්වා දින 19ක් පවත්වනු ලැබුවා. 

එහිදී විසර්ජන පනත් කෙටුම්පත තෙවනවර කියවීමේ ඡන්ද විමසීම පස්වරු 7.40ට ආරම්භ කෙරුණු අතර එහිදී පක්ෂව ඡන්ද 159ක් ද විපක්ෂව ඡන්ද 45ක් හිමිවුණා. 

ඒ අනුව 2025 විසර්ජන පනත් කෙටුම්පත වැඩි ඡන්ද 114කින් පාර්ලිමේන්තුවේදී සම්මත කරනු ලැබුවා.