මාස දෙකක සටන්විරාම එකඟතාවය කඩකරමින් ඊශ්‍රායලය විසින් මාර්තු මස18 වන දින ගාසා තීරය වෙත දරුණු ප්‍රහාරයක් එල්ල කරන ලදි. ඇස්තමේන්තු ගණන පරිදි පුද්ගලයින් 400කට අධික පිරිසකට සිය ජීවිත අහිමිව ගොස් තවත් පුද්ගලයින් බොහෝ පිරිසක් රෝහල්ගත කර ඇති අතර සුන්බුන් අතර තවත් පුද්ගලයින් සිර වී සිටින බව ද වාර්තා විය. අද දින Global Eye විශේෂාංගය වෙන්වනුයේ ඊශ්‍රායල් හා ගාසා තීරයේ වත්මන් තත්ත්වය වෙතයි. ප්‍රහාරයෙන් ලබන බව විදෙස් මාධ්‍ය වාර්තා කළේය.

මෙම සටන් විරාමය ආරම්භ වූයේ මාස 15ක් පුරා අඛණ්ඩව පැවති ගාසා - ඊශ්‍රායල් යුද්ධයට නිමාවක් සනිටුහන් කරමිනි. ඒ අනුව සටන් විරාමය සති 6ක කාලයක් එනම් දින 42ක කාලයක් පැවතීමට නියමිත වූ අතර එය අදියර 3කින් යුක්ත විය. අමෙරිකාව, කටාර් රාජ්‍යය සහ ඊජිප්තුවේ මැදිහත්කාරිත්වයෙන් යුක්තව මෙම සටන්විරාම සාකච්ඡා කිරීම් සිදු කෙරුණු අතර දෝහාහි පැවති සාකච්ඡාවල අවසන් ප්‍රතිඵලය ලෙස ඊශ්‍රායල හා හමාස් අතර තාවකාලික සටන් විරාමයකට ප්‍රවේශය හිමි විය.

පසුගිය ජනවාරි 19 වැනිදා ඊශ්‍රායලය සහ හමාස් සංවිධානය අතර අත්සන් තැබූ සටන්විරාම ගිවිසුමට පසු ගාසා වෙත එල්ල වූ දැවැන්ත ම ප්‍රහාරය ලෙස මෙම ප්‍රහාරය ඉතිහාසයට එක් වේ. මෙම ප්‍රහාරය පිළිබඳව අදහස් දක්වමින් ඊශ්‍රායලය පවසා සිටියේ සිය ඉලක්කය වූයේ හමාස් සංවිධානය බවයි. ගාසා හි සියලුම කලාප පාහේ ඉලක්ක කරගත් මේ ප්‍රහාරවලින් වැඩි ම හානි සිදුව තිබුණේ දකුණු ගාසා හි ඛාන් යුනිස් වෙත සහ උතුරු ගාසාහි ගාසා නගරය වෙත ය. ගාසා බලධාරීන්ට අනුව ප්‍රහාරවලින් මියගිය පිරිස අතරට කුඩා ළමයින් ද අයත් වන බවයි. කෙසේ නමුත් සටන්විරාම ගිවිසුම බිඳවැටෙන ලකුණු පළකරමින් ගාසා තීරය වෙත සිදු කරන සියලු ම භාණ්ඩ සැපයුම් අවහිර කිරීමට ඊශ්‍රායලය මීට සති කිහිපයකට පෙර කටයුතු කරන ලදි. ඊශ්‍රායලය සහ හමාස් සංවිධානය අතර පැවති සටන් විරාම ගිවිසුම තවදුරටත් දීර්ඝ කරගැනීම සඳහා පැවති සාකච්ඡා අසාර්ථක වීමෙන් පසු ඊශ්‍රායලය මෙම ප්‍රහාරය එල්ල කර ඇත. එසේ සටන්විරාම ගිවිසුමේ පළමු අදියර තවදුරටත් දීර්ඝ කරන ලෙස බලකිරීමේ අරමුණින් විවිධ වාරණයන් ගාසාව වෙත ඊශ්‍රායලය එල්ල කළ අතර ගාසා වෙත විදුලිය සැපයීම අවහිර කිරීම මෙන් ම අතරින් පතර ප්‍රහාර කිහිපයක් ද එල්ල කළහ. නමුත් දැවැන්ත ගනයෙහිලා සැකලෙන මෙතරම් විශාල ප්‍රහාර මාලාවක් එල්ල කෙරුණේ ඊයේ දිනයේ දී ය. මෙහි දී වාර්තා ගත තොරතුරුවලට අනුව ගුවන් ප්‍රහාරවලට අමතරව දකුණු දිග ඛාන් යුනුස් වෙත යුධ ටැංකි යොදා ෂෙල් ප්‍රහාර පවා එල්ල කර තිබුණි. එමෙන් ම ප්‍රහාරයට පෙර ඒ සම්බන්ධව අමෙරිකාව දැනුම්වත් කිරීමට ඊශ්‍රායලය කටයුතු කර ඇති බව ද වාර්තා වේ.

හමාස් සංවිධානය යළි සංවිධාන ගත වෙමින් පවතින බවට ඊශ්‍රායලය චෝදනා එල්ල කර සිටින අතර අවශ්‍ය වුවහොත් අඛණ්ඩව ඔවුන් වෙත ප්‍රහාර එල්ල කිරීමට කටයුතු කරන බවත් ඊශ්‍රායලය ප්‍රකාශ කර තිබිණ. එමෙන්ම හමාස් සටන්කාමීන් භාරයේ සිටින සිය ප්‍රාන ඇපකරුවන් මුදාගැනීමේ මෙහෙයුම් තවදුරටත් සිදු කරන බව ද ඔවුන් ප්‍රකාශ කර තිබේ. ගාසා වෙත ගොඩබිම් ප්‍රහාරයක් එල්ල කිරීමට ඇති අවකාශ පිළිබඳව ද ඊශ්‍රායලය මීට ප්‍රථම ඉඟි පළ කර තිබුණි.

මාර්තු 23 වන දින එනම් ඊයේ දිනයේ ඊශ්‍රායල විසින් එල්ල කළ ගුවන් ප්‍රහාරයකින් දකුණු ගාසා තීරයේ හමාස් ඉහළ ම දේශපාලන නායකයකු වන සලාහ් අල්-බර්දාවීල් මෙන් ම ඔහුගේ බිරිඳ ද ජීවිතක්ෂයට පත් වූ බව හමාස් සංවිධානය නිල වශයෙන් ප්‍රකාශ කරන ලදී. සලාහ් අල්-බර්දාවිල් යනු හමාස් දේශපාලන කාර්යාංශයේ ජ්‍යෙෂ්ඨ සාමාජිකයෙකු මෙන් ම වර්ෂ 2025 දක්වා ම සංවිධානයේ ප්‍රකාශකයෙකු වූ අයෙකි. ඔහු 2006 වසරේ සිට වසර 2018 දක්වා පාර්ලිමේන්තුව විසුරුවා හරින තෙක් හමාස් නියෝජනය කරමින් පලස්තීන ව්‍යවස්ථාදායක මණ්ඩලයේ සාමාජිකයෙකු ලෙස ද සේවය කළ අයෙකි.

ඊශ්‍රායලයේ මෙම ප්‍රහාරවල ඉලක්කය වන්නේ ත්‍රස්තවාදීන් බව ඔවුන් ප්‍රකාශ කර සිටි අතර තව දුරටත් ගාසා තීරය වෙත ගුවනින්, මුහුදෙන් සහ ගොඩබිමින් එල්ල කරන ප්‍රහාර තීව්‍ර කරන බවට දඔවුන් අනතුරු අඟවා තිබුණි. ඒ අනුව ඊශ්‍රායලය ගාසා තීරයේ තුර්කි - පලස්තීන මිත්‍රත්ව රෝහල ඉලක්ක කරමින් දැවැන්ත ගුවන්ප්‍රහාරයක් ද එල්ල කළේය. විශේෂයෙන් පිළිකා රෝගීන් වෙනුවෙන් වෙන් වූ මෙම රෝහල සැලකෙන්නේ ගාසා තීරයේ විශාලත ම රෝහල ලෙසයි. විදෙස් මාධ්‍ය වාර්තා කර ඇති තොරතුරු පරිදි නිරාවරණය වන්නේ ගාසාහි සිටින සියලු ම ඊශ්‍රායල ප්‍රාණ ඇපකරුවන් නිදහස් කරන තෙක් මෙම ප්‍රහාර දියත් කිරීමට ඊශ්‍රායලය සැලසුම් වී ඇති බවයි. යුද්ධය ආරම්භ වූ දා සිට ගාසා තීරයේ මුළු මරණ සංඛ්‍යාව ඉරිදා 50,000 ඉක්මවා ගිය බව හමාස් පාලනය කරන සෞඛ්‍ය බලධාරීන් නිල වශයෙන් ප්‍රකාශ කළ අතර ඉරිදා සිට මේ දක්වා ඛාන් යුනිස් සහ රෆා යන ප්‍රදේශයන්හි අවම වශයෙන් පුද්ගලයින් 30 දෙනෙකු මිය ගොස් තිබේ.

පහතින් දැක්වෙනුයේ ගාසාහි වත්මන් තත්ත්වයේ ඡායාරූපයි.

සැකසුම හා සංස්කරනණය - ප්‍රසිලා සඳරුවනි