හෙටින් ආරම්භ වන සතියේදී විදුලිය කප්පාදු කෙරෙන කාලසීමාව අඩු කිරීමේ ප‍්‍රවණතාවක් පවතින බව ශී‍්‍ර ලංකා මහජන උපයෝගීතා කොමිසම පවසනවා.
ඒ, හදිසියේ අකි‍්‍රය වු නොරොච්චෝලේ තාප විදුලි බලාගාරයේ පළමු ජනන යන්ත‍්‍රය යළි ඊයේ දිනයේ ජාතික පද්ධතියට එක් කිරීමත් සමඟ පවතින තත්ත්වය පිළිබඳව සැලකිල්ලට ගනිමින්. පළමු ජනන යන්ත‍්‍රය අකි‍්‍රය වීම සහ දෙවන ජනන යන්ත‍්‍රය අලූත්වැඩියාවක් හේතුවෙන් නවතා දැමීම හේතුවෙන් පසුගිය 15 වනදා සිට මේ දක්වා දිනකට පැය 3 ක කාලයක් විදුලි කප්පාදුවක් කෙරුණා.
ඒ් සමග විදුලි කප්පාදු කාලයේ අඩු වීමක් සිදුවන්නේද යන්න පිළිබදව දැනුම් දෙන ලෙසයි මහජන උපයෝගීතා කොමිසමේ සභාපති ජනක රත්නායක විදුලිබල මණ්ඩලයට උපදෙස් ලබා දුන්නේ.
ඊට ප‍්‍රතිචාර දක්වමින් ලංකා විදුලිබල මණ්ඩලය ප‍්‍රකාශ කළේ විදුලිය කප්පාදු කෙරෙන කාලසීමාව සංශෝධනය සම්බන්ධයෙන් මහජන උපයෝගිතා කොමිසමට කඩිනමින් දැනුම් දීමට කටයුතු කරන බවයි. විදුලිබලය උත්පාදනයට අවශ්‍ය ඉන්ධන සංචිත ප‍්‍රමාණය හා ජල විදුලි බලාගාර පිළිබඳ තත්ත්වය සලකා බැලීමෙන් අනතුරුව ඒ පිළිබඳව මහජන උපයෝගිතා කොමිසම වෙත දැනුම්දීමට පියවර ගන්නා බවයි විදුලි බල මණ්ඩලයේ මාධ්‍ය ප‍්‍රකාශක ඇන්ඩෲ නවමනී සඳහන් කළේ.
