උද්ගත වූ ජනතා විරෝධතා හමුවේ දිවයිනෙන් පිටත්ව ගොස් තායිලන්තයේ රැඳී සිටි හිටපු ජනාධිපති ගෝඨාභය රාපක්ෂ ඊයේ රාත‍්‍රියේ දිවයිනට පැමිණියා.

ඒ,සිංගප්පූරු ගුවන් සේවයට අයත් එස්.කිව්. 468 දරණ යානයෙන්.

හිටපු ජනාධිපතිවරයා සමඟ ඔහුගේ බිරිඳ අයෝමා රාජපක්ෂ ද පැමිණ තිබුණා.

හිටපු ජනාධිපතිවරයා පිළිගැනීම සඳහා මැති ඇමතිවරුන් පිරිසක්ද කටුනායක ගුවන් තොටුපලට පැමිණ තිබූ අතර, එහි ආරක්ෂාවද දැඩි කිරීමටයි පියවර ගෙන ඇති ආකාරය දැකගත හැකිවුණා.

මාසයකුත් දින 20ක කාලයක් හිටපු ජනාධිපතිවරයා රැඳී සිටියේ මාලදිවයින, සිංගප්පූරුව සහ තායිලන්තය යන රටවලයි.

හිටපු ජනාධිපතිවරයාගේ ආරක්ෂාව සම්බන්ධයෙන් අවධානය යොමු කරමින් රජය විසින් ලබාදෙන කොළඹ පිහිටි නිවසක ගෝඨාභය රාජපක්ෂ ඉදිරියේදී රැඳී සිටිනු ඇති බවයි AFP පුවත් සේවය ඊයේ වාර්තා කර තිබුණේ.

පොලිස්, හමුදා සහ විශේෂ කාර්ය බලකා සාමාජිකයින්ගෙන් සමන්විත ආරක්ෂක ඒකකයක්ද හිටපු ජනාධිපතිවරයාගේ ආරක්ෂාව වෙනුවෙන් යොදවන බවද AFP පුවත් සේවය වැඩිදුරටත් සඳහන් කළා.

මෙරට පැවති අරගලකාරී වාතාවරණය හේතුවෙන් පසුගිය ජූලි 13 වැනිදා මාලදිවයින බලා පිටව ගිය හිටපු ජනාධිපති ගෝඨාභය රාජපක්ෂ දින කිහිපයක් සිංගප්පූරුවේ රැඳී සිටි අතර ඔහු තායිලන්තයේ බැංකොක් නුවරට පැමිණියේ පසුගිය අගෝස්තු 11 වැනිදායි.