දෙවන එලිසබෙත් රැජිණගේ අභාවය වෙනුවෙන් ලබන 19 වනදා ජාතික ශෝක දිනයක් ලෙස ප‍්‍රකාශයට පත්කල බව රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යාංශය පවසනවා.
නිවේදනයක් නිකුත් කරමින් එම අමාත්‍යාංශය සඳහන් කළේ 1952 සිට 1972 දක්වා ශී‍්‍ර ලංකාවේ අගරැජින ලෙස කටයුතු කළ දෙවන එළිසෙබත් රැජිනගේ අවමංගල්‍ය උත්සවය එදිනට යෙදී ඇති බැවින් රජය මෙම තීරණය ගෙන ඇති බවයි.
ඒ අනුව ලබන 19 වනදා දක්වා සියලූ රාජ්‍ය ආයතන වල ජාතික කොඩිය අඩකුඹු කර තබන ලෙසටයි රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යාංශය දැනුම් දී ඇත්තේ.
මේ අතර දෙවන එලිසබෙත් මහ රැජිණගේ අභාවයෙන් පසු නව රජු ලෙස නම් කළ ඇයගේ වැඩිමහල් පුතු වන තුන්වන චාල්ස් රජු ස්කොට්ලන්තයේ බැල්මොරල් මාලිගයේ සිට ලන්ඩන් වෙත ඊයේ පැමිණියා.
තුන්වන චාල්ස් රජු ජාතිය අමතමින් ඊයේ සඳහන් කළේ පක්ෂපාතීත්වයෙන්, ගෞරවයෙන් සහ ආදරයෙන් එක්සත් රාජධානියේ ජනතාවට සේවය කරන බවයි.
වසර හැත්තෑවක කාලයක් කිරුළ දැරූ බි‍්‍රතාන්‍ය මහ රැජිණ ස්කොට්ලන්තයේ බැල්මොරල් මාලිගයේදී පෙරේදා අභාවප‍්‍රාප්ත වූ අතර ඒ වන විට ඇය 96 වන වියෙහි පසු වුණා.
1926 වසරේ අප්‍රේල් 21 වනදා උපත ලැබූ එළිසබෙත් කුමරිය රාජකීය ධුරාවලියට නම් කෙරෙන්නේ ඇයට වයස අවුරුදු 10 දියි. ඒ, ඇයගේ පියා වන හයවන ජෝර්ජ් කුමරු බි‍්‍රතාන්‍යයේ රජු බවට පත්වීමත් සමඟයි.
හිරු නොබසින අධිරාජ්‍යයේ කිරුළ ඇයට විසිපස්වන වියේදී හිමිවූයේ පියාගේ අභාවයෙන් අනතුරුවයි. එතැන් සිට දශක හතක කාලයක් බ්‍රිතාන්‍යයේ කිරුළ හෙබවූ ඇය ලොව දීර්ඝතම කාලයක් බලයේ රැඳී සිටි රාජකීයයා බවට පත්වුණා.
මේ අතර බකිංහැම් මාලිගය ඉදිරිපිටට රැස්වූ අති විශාල ජනකායක් රැජිණගේ අභාවය වෙනුවෙන් ශෝකය පළකරමින් පුෂ්පෝපහාර පළකරන අකාරය විදෙස් මාධ්‍ය වාර්තා කර ඇති අතර දේවස්ථාන ආශ‍්‍රිතව විවිධ වැඩසටහන් පවත්වනු ලබනවා.
එමෙන්ම, බ්‍රිතාන්‍යයේ පැවැත්වීමට සැළසුම් කර තිබූ විවිධ උත්සව සහ ක‍්‍රීඩා තරගාවලිද අවලංගු කිරීමට පියවර ගෙන ඇති බවයි විදෙස් වාර්තා සදහන් කළේ. එමෙන්ම, රැජිනට ගෞරවය පළ කරමින් ලන්ඩනයේ ස්ථාන කිහිපයකදී ආචාර වෙඩි මුර පළ කිරීම සිදුකෙරුණා.
