සීදුව වෑත්තෑව නන්දාරාම විහාරස්ථානයේ විහාරාධිපති හිමියන් ඝාතනය ඇත්තේ එම විහාරස්ථානයේ තිබූ ඩිෆෙන්ඩර් රථයක් සහ මෝටර් රථයක් සම්බන්ධයෙන් ඇති වූ ආරවුලක් හේතුවෙන් බවට අනාවරණය වී තිබෙනවා.
සිද්ධිය සම්බන්ධයෙන් සැකපිට එම විහාරස්ථානයේ සිට අතුරුදන් වූ හිමිනමක් අත්අඩංගුවට ගත් අතර, උන්වහන්සේගෙන් පොලීසිය ප‍්‍රකාශ සටහන් කරගනිමින් සිටිනවා.
මෙම හිමියන් ඊයේ අළුයම කටුනායක ගුවන්තොටුපළෙන් ඩුබායි බලා පිටත්ව යාමට සූදානම්ව සිටියදී ආගමන විගමන නිලධාරින් විසින් අත්අඩංගුවට ගනු ලැබුවා.
සීදුව වෑත්තෑව නන්දාරාම විහාරස්ථානයේ විහාරාධිපති පූජ්‍ය මැදගමුවේ මහානාම හිමියන්ගේ දේහය උන්වහන්සේ වැඩසිටි කාමරයේ තිබියදී සොයාගනු ලැබුවේ පෙරේදා පස්වරුවේයි.
මළසිරුර සොයාගන්නා අවස්ථාවේ දෑස් බැද මුවට රෙදි කඩක් ඔබා තිබූ බවටයි පොලිසිය සඳහන් කළේ.
එමෙන්ම විහාරස්ථානයේ තිබූ ඩිෆෙන්ඩර් රථයක් සහ තවත් මෝටර් රථයක් අතුරුදන් වී තිබුණා. පසුව සිදුකළ විමර්ශනවලදී අනාවරණය වූයේ විහාරස්ථානයේ වැඩ විසූ හිමිනමක්ද කිසිවෙකුටත් නොදන්වා විහාරස්ථානයෙන් පිටව ගොස් තිබුණු බවටයි.
ඒ අනුව පොලිසිය විමර්ශන ආරම්භ කර අතර සිද්ධියට අදාළව අතුරුදන් වූ 18 හැවිරිදි එම හිමි නම ඊයේ අළුයම ගුවන්තොටුපළේදී අත්අඩංගුවට ගැණුනා.
දැනට සිදුකරන ලද විමර්ශනවලින් අනාවරණය වී ඇත්තේ විහාරාධිපති හිමියන් ඝාතනය කොට විහාරස්ථානයේ තිබු ඩිෆෙන්ඩර් රථය සහ මෝටර් රථය අදාළ හිමිනම විසින් ව්‍යාජ ලෙස පැවරුම් ලිපි සකස් කර රුපියල් කෝටි දෙකකට අලෙවි කර ඇති බවයි.
අලෙවි කරන ලද ඩිෆෙන්ඩර් රථය සහ මෝටර් රථය පොලිසිය සොයා ගෙන ඇති අතර, ඝාතනය සඳහා තවත් පුද්ගලයින් කිහිපදෙනෙකු එක් වී ඇති බවට ද පොලිසිය සැක පළ කරනවා. අත්අඩංගුවට ගත් සැකකාර හිමිනම මීගමුව මහේස්ත‍්‍රාත් අධිකරණය වෙත ඉදිරිපත් කිරීමෙන් පසු දින දෙකක් රඳවාගෙන ප‍්‍රශ්න කිරීමටයි නියෝග කර ඇත්තේ.
