ආහාරය සඳහා කලටි පොල්මද රැගෙන ආ සිසුවියක පිළිබඳව මිනුවන්ගොඩ පාසලකින් වාර්තා වුණා.
පවතින ආර්ථික අර්බුදය හමුවේ දරුවන් මුහුණ දෙන අපහසුතා අනන්ත බව සැඟවීමට කරුණක් නොවේ.
කුසගින්න නිසා පාසලේ බුද්ධ පූජාව ආහාරයට ගත් දරුවන් දෙදෙනෙකු ගැන මෙන්ම, මිරිස් කුඩු පමණක් ඉස බත් ආහාරයට ගත් සිසුවියක පිළිබද තොරතුරු වාර්තා වී තවම වැඩි දිනක් ගතවී නැහැ.
එවන් වටපිටාවක් තුළ පාසල් දිවා ආහාරයට කළටි පොල් මද රැගෙන ආ සිසුවියක් පිළිබඳව තොරතුරු මිනුවන්ගොඩ අධ්‍යාපන කලාපයේ කනිෂ්ඨ ද්වීතියික පාසලකින් වාර්තා වනවා.
පාසලේ ශිෂ්‍ය නායිකාවක් ද වන ඇය 9 ශ්‍රේණියේ ඉගෙනුම ලබන අතර ඇයගේ පියා කුලී රැකියාවක නිරතවන බව සඳහන්.
පාසල් දිවා ආහාර කාලය තුළ මෙම සිසුවිය මිතුරියන් සමඟ එක්ව කළටි පොල් මද ආහාරයට ලබා ගන්නා ආකාරය දැක ඇත්තේ පන්තිභාර ගුරුතුමිය විසින්. පසුව එම ගුරුතුමිය පාසලේ අනෙකුත් ගුරුභවතුන් සමඟ මේ සම්බන්ධයෙන් සාකච්ඡා කර පාසලේ සිටින එවැනි ළමුන් කිහිප දෙනෙකුට ආහාර සපයා දීමටද කටයුතු කර තිබෙනවා.
මිනුවන්ගොඩ ප‍්‍රදේශයේ අඩු ආදායම්ලාභි දෙමාපියන් රැසකගේ දරුවන් පැමිණෙන්නේ මෙම කනිෂ්ඨ ද්වීතියික පාසල වෙතයි.
මෙම පාසලේ පළමු ශ්‍රේණියේ සිට 5 වන ශ්‍රේණිය සඳහා ඉගෙනුම ලබන දරුවන්ට දිවා ආහාරය ලබා දිමේ වැඩසටහනක්ද ක්‍රියාත්මක වනවා. ඒ අනුව පෙරේදා එම පාසලේ සිසුන්ට දිවා ආහාරය සඳහා බත් සමඟ පරිප්පු ලබා දි ඇති අතර පසුව පරිප්පු අවසන් විම නිසා 3 ශ්‍රේණියේ දරුවන්ට බත් පමණක් ආහාරයට ලබා දි ඇති බව අප වාර්තාකරු ප‍්‍රකාශ කළා.
