අගෝස්තු 25 වනදා ඩුබායි හි බ්ලැක් සෑන්ඞ් කොමඩිටීස් සමාගමට ලබාදුන් ගල් අඟුරු ටෙන්ඩරය අමාත්‍ය මණ්ඩලය විසින් අවලංගු කර තිබෙනවා. ඒ විදුලිබල හා බලශක්ති අමාත්‍යාංශය ඊයේ අමාත්‍ය මණ්ඩලයට ඉදිරිපත් කළ ඉල්ලීමකට අනුවයි.
විදුලිබල හා බලශක්ති අමාත්‍ය කංචන විජේසේකර මේ පිළිබඳව සිය ට්විටර් ගිණුමට සටහනක් එක් කරමින් සඳහන් කර ඇත්තේ, අදාළ ටෙන්ඩරය අවලංගු කිරීමෙන් පසු දිගුකාලීන ණය පදනමක් මත ගල් අඟුරු සැපයීමට හැකි සැපයුම්කරුවෙකුට ඉඩ සලසා දෙමින් නව ටෙන්ඩර් කැඳවීමක් ලංකා ගල් අගුරු සමාගම විසින් ප‍්‍රකාශයට පත් කරනු ඇති බවයි.
ඩුබායි සමාගමක් වන බ්ලැක් සෑන්ඞ් කොමඩිටිස් සමාගමට අදාළ ටෙන්ඩරය ප‍්‍රදානය කිරීමෙන් පසු පූජ්‍ය ඕමල්පේ සෝභිත හිමියන් අධිකරණය හමුවේ මූලික අයිතිවාසිකම් පෙත්සමක් ගොනු කළා. ටෙන්ඩර් පටිපාටියට පටහැනිව එය අදාළ සැපයුම්කරුට පිරිනමා ඇති බවටයි එම පෙත්සමෙන් පෙන්වා දී තිබුණේ.
කෙසේ වෙතත්, පවතින නීතිමය කටයුතු සහ ගෙවීම් සහතික කිරීමේ අවදානම කෙරෙහි ඇති බලපෑම මත ගල් අඟුරු සැපයුම සිදුකළ නොහැකි බව තෝරා ගත් සැපයුම්කරු විසින් ලංකා ගල් අඟුරු සමාගම වෙත දැනුම්දී තිබුණා.
එම තත්වය හමුවේ මෙරට විදුලි උත්පාදනයට වැඩි දායකත්වයක් ලබාදෙන නොරොච්චෝලේ ලක් විජය බලාගාරයේ විදුලි ජනනයට අවශ්‍ය ගල් අඟුරු සපයා ගැනීම අර්බුදකාරි තත්වයකට පත්වුණා.
ලබන ඔක්තෝබර් මස 28 වනදායින් පසු දැනට ඇති ගල් අඟුරු අවසන් වීම හේතුවෙන් නොරොච්චෝලේ බලාගාරයේ ජනන යන්ත‍්‍ර තුනම අක‍්‍රිය තත්වයට පත්වීමේ අවධානමක් නිර්මාණය වී ඇති අතර මෙම තත්වය හමුවේ දෛනික විදුලි කප්පාදුව පැය 10 ත් 12 ත් අතර කාලයකින් දීර්ඝ වීමේ අවදානමක් මතුව ඇති බවයි මහජන උපයෝගිතා කොමිසන් සභාවේ සභාපති ජනක රත්නායක ප‍්‍රකාශ කළේ.
කෙසේ වෙතත් ක්ෂණික අවශ්‍යතා සපුරාලීම සඳහා පසුගිය වසරවල ප‍්‍රදානය කළ ටෙන්ඩර්වලින් ගල්අඟුරු නැව් 19 ක් මිලදී ගැනීමට අවශ්‍ය මුදල් සපයා ගැනීම සඳහා ඊයේ අමාත්‍ය මණ්ඩලයේදී අවශ්‍ය තීන්දු තීරණ ගෙන ඇති බවද සඳහන්.
