පාස්කු ඉරුදින ත‍්‍රස්ත ප‍්‍රහාරය සම්බන්ධයෙන් ඉදිරිපත් කර ඇති මූලික අයිතිවාසිකම් පෙත්සම්වල වගඋත්තරකරුවෙකු ලෙස නම් කර සිටින ජනාධිපති රනිල් වික‍්‍රමසිංහට එරෙහිව එම නඩු කටයුතු පවත්වාගෙන යා නොහැකි බව ශ්‍රේෂ්ඨාධිකරණය තීරණය කර තිබෙනවා.
අගවිනිසුරු ජයන්ත ජයසූරිය, බුවනෙක අළුවිහාරේ, එල්.ටී.බී.දෙහිදෙණිය, මෘදු ප‍්‍රනාන්දු, එස් තුරෙයිරාජා, ඒ.එච්.එම්.ඞී. නවාස් සහ ෂිරාන් ගුණරත්න යන සත්පුද්ගල ශ්‍රේෂ්ඨාධිකරණ විනිසුරු මඩුල්ලක් විසිනුයි මෙම තීන්දුව අද ලබාදුන්නේ.
තීන්දුව ප‍්‍රකාශයට පත් කරමින් අග විනිසුරු ජයන්ත ජයසූරිය සඳහන් කළේ ආණ්ඩු ක‍්‍රම ව්‍යවස්ථාවේ 35 – එක වගන්තිය යටතේ වත්මන් ජනාධිපති රනිල් වික‍්‍රමසිංහට මුක්තියක් හිමිවන බවයි.
එම වගන්තිය ප‍්‍රකාරව වර්තමානයේ ජනපති ධුරය දරණ තැනැත්තෙකුට එරෙහිව නඩු කටයුතු පවත්වාගෙන යා නොහැකි බවද අගවිනිසුරුවරයා පෙන්වා දුන්නා.
රාජ්‍ය නායකයෙකුට තම නිල කටයුතු බාධාවකින් තොරව පවත්වාගෙන යාම සඳහා එම වගන්තිය හඳුන්වා තිබෙන බවත්, නඩු තීන්දුවේ සඳහන්.
පාස්කු ඉරුදින ත‍්‍රස්ත ප‍්‍රහාරයක් එල්ල කිරීමට නියමිත බවට බුද්ධි තොරතුරු ලැබී තිබියදීත් එය වළක්වා ගැනීමට පියවර නොගැනීම සම්බන්ධයෙන් ඉදිරිපත් කර ඇති මූලික අයිතිවාසිකම් පෙත්සම්වල වගඋත්තරකරුවෙකු වශයෙන් එවකට අග‍්‍රාමාත්‍යවරයා ලෙස කටයුතු කළ රනිල් වික‍්‍රමසිංහ නම් කර තිබුණා.
එහෙත් ඔහු පසුගියදා ජනාධිපතිවරයා වශයෙන් දිවුරුම් දී ඇති බැවින් ආණ්ඩුක‍්‍රම ව්‍යවස්ථාවේ 35 වන වගන්තිය යටතේ ඔහුට එරෙහිව මෙම නඩුකරය පවත්වාගෙන යාමට නොහැකි බැවින් මෙම පෙත්සම්වලින් නිදහස් කරන ලෙස ජනාධිපතිවරයාගේ නීතීඥවරුන් අධිකරණයෙන් ඉල්ලා තිබුණා.
ඉල්ලීම්වලට අදාළ පෙත්සම්වල වගඋත්තරකරුවන් වශයෙන් නම් කර සිටින හිටපු ජනාධිපති මෛත‍්‍රිපාල සිරිසේන ඇතුළු පාර්ශව කිහිපයක් විරෝධය පළ කළා.
එහෙත් දීර්ඝ කරුණු අධ්‍යනයකින් පසුවයි අධිකරණය මෙම තීන්දුව අද ප‍්‍රකාශයට පත් කරනු ලැබුවේ.
පාස්කු ප‍්‍රහාරයෙන් වින්දිතයන් බවට පත්වූ පුද්ගලයින්, කතෝලික පියතුමන්ලා, ශ‍්‍රී ලංකා නීතීඥ සංගමය ඇතුලූ පාර්ශව 13 ක් මෙම අයිතිවාසිකම් පෙත්සම් ඉදිරිපත් කර තිබුණා.
මෙම පෙත්සම්වල වැඩිදුර විභාගය මේ මස 29 වනදා පැවැත්වීමට නියමිතයි.
