තඹුත්තේගම ආර්ථික මධ්‍යස්ථානයේ ව්‍යාපාරිකයෙකු විසින් නගරයේ පෞද්ගලික බැංකුවක තැන්පත් කිරීමට රැගෙන ආ රුපියල් ලක්ෂ 223ක මුදලක් කොල්ලකා පළා යමින් සිටි සැකකරුවන් දෙදෙනෙකු, ගිනි අවි සමඟ අත්අඩංගුවට ගෙන තිබෙනවා.

පොලිසිය සඳහන් කළේ ව්‍යාපාරිකයා අද දහවල් මෝටර් රථයෙන් පැමිණ බැංකුවට ඇතුලූ වීමට ගමන් කරන අවස්ථාවේ යතුරු පැදියකින් පැමිණි කොල්ලකරුවන් ගිනි අවි පෙන්වා මෙම කොල්ලය සිදුකර ඇති බවයි.

පසුව එම ස්ථානය ආසන්නයෙන් ගමන් කළ තඹුත්තේගම පොලිස් ස්ථානයට අනුයුක්ත සැරයන් වරයෙකු කොල්ලකරුවන් පැමිණි යතුරු පැදිය ඉදිරිපිටට පැමිණ මග හරස් කර තිබෙනවා.

එම අවස්ථාවේ දී කොල්ලකරුවන් පොලිස් සැරයන්වරයාට මිරිස් කුඩු ප‍්‍රහාරයක් ද එල්ල කර ඇති අතර, එය ද නොතකා ප‍්‍රදේශවාසීන් සමඟ එක්ව කොල්ලකරුවන් මෙල්ල කර තිබෙනවා.

පසුව ඔවුන් පොලිස් භාරයට ගෙන ඇති අතර සැකකරුවන් සතුව තිබි කොල්ල කන ලද මුදල්, මෙරට නිෂ්පාදිත ගිනි අවියක්, තියුණු ආයුධයක්, අත්වැස්මක් සහ ජංගම දුරකතනයක් පොලිස් භාරයට ගැනුණා.

සැකකරුවන් අවුරුදු 48 සහ 50 වයස්වල පසුවන අතර ඔවුන් තඹුත්තේගම ප‍්‍රදේශයේම පදිංචිකරුවන් වනවා. ඉන් එක් සැකකරුවෙකු අදාළ පෞද්ගලික බැංකුවේ ආරක්ෂකයෙකු ලෙස සේවය කරන බවටයි පොලිසිය සඳහන් කළේ.

මේ අතර, අද දහවල් මහරගම පන්නිපිටිය ප‍්‍රදේශයේ ඖෂධ අලෙවිසැලකට ඇතුළුවූ පුද්ගලයින් දෙදෙනෙකු ගිනි අවි පෙන්වා රුපියල් පනස් දහසක මුදලක් කොල්ලකා පලා ගොස් තිබෙනවා.

පොලිසිය සඳහන් කළේ, යතුරු පැදියකින් පැමිණි දෙදෙනෙකු විසින් මෙම කොල්ලකෑම සිදු කර ඇති බවයි .