.png)
කජීමාවත්තේ ගින්නෙන් නිවාස 80 ක් විනාශයි – 220 ක් අවතැන්.
තොටළඟ – කජීමාවත්තේ ඇති වූ ගින්නෙන් පැල්පත් නිවාස 80ක් විනාශ වී ඇති බව පොලිසිය සඳහන් කළා. එහි සිටි 220ක පිරිසක් කැලණිය නදී විහාස්ථානයේ සහ මෝදරඋයන මහල් නිවාස සංකීර්ණයේ ප‍්‍රජා ශාලාවේ රදවා ඇති බවයි වාර්තා වන්නේ.
ගින්නට හේතුව මෙතෙක් අනාවරණ වී නොමැති අතර, ග‍්‍රෑන්ඞ්පාස් පොලිසියේ උසස් නිලධාරියෙකු සඳහන් කළේ අද එම ස්ථානය පරීක්ෂා කිිරීම සඳහා රස පරීක්ෂක දෙපාර්තමේන්තුවේ නිලධාරීන් පැමිණීමට නියමිත බවයි.
ඊයේ රාත‍්‍රී අටට පමණ තොටළඟ – මෝදරඋයන මහල් නිවාස සංකීර්ණය අසළ පිහිටි කජීමාවත්තේ මෙම ගින්න හටගත් අතර, ගින්න මැඩපැවැත්වීම සඳහා ගිනි නිවීමේ රථ 10 ක් පමණ යෙදවීමටයි පියවර ගැනුණේ.
ඒ සඳහා කොළඹ මහ නගර සභාවේ ගිනි නිවීමේ රථ මෙන්ම නාවික හමුදාවේ ගිනි නිවීමේ රථද එක්ව තිබුණා.
ග‍්‍රෑන්ඞ්පාස් පොලිසිය සඳහන් කළේ මේ සම්බන්ධයෙන් එම ප‍්‍රදේශයේ ජනතාවගෙන් අද ප‍්‍රකාශ ගැනීමට නියමිත අතර විමර්ශණ සඳහා කණ්ඩායම් තුනක් යොදවා ඇති බවයි.
මේ අතර මෙම ගින්න හේතුවෙන් පීඩාවට පත් ජනතාවට කඩිනමින් සහන සැලසීමට පියවර ගන්නැයි මේ දිනවල ජපානයේ සංචාරයක නිරත ජනාධිපති රනිල් වික‍්‍රමසිංහ ජනාධිපති ලේකම්වරයා වෙත උපදෙස් ලබාදී තිබෙනවා.
ජනාධිපතිවරයා එහිදී ජනාධිපති ලේකම් සමන් ඒකනායක වෙත උපදෙස් ලබාදී ඇත්තේ ති‍්‍රවිධ හමුදාපතිවරුන්ට, කොළඹ දිස්ති‍්‍රක් ලේකම්වරයාට සහ අදාළ බලධාරින්ට ඒ සම්බන්ධයෙන් වහාම උපදෙස් ලබාදෙන ලෙසයි.
ඒ අනුව ජනාධිපති ලේකම්වරයා විසින් අදාළ පාර්ශව වෙත අවශ්‍ය උපදෙස් ලබාදී ඇති බවයි ජනාධිපති මාධ්‍ය ඒකකය සඳහන් කළේ.
