පාසල් සිසුවියකට කොසුමිටකින් පහරදුන් බවට චෝදනා එල්ල වූ කොටගල – පතන – බෝගහවත්ත ප‍්‍රදේශයේ පාසලක විදුහල්පතිවරයාට තාවකාලික ස්ථාන මාරුවක් ලබාදී තිබෙනවා.
ඒ, මධ්‍යම පළාත් ආණ්ඩුකාර නීතිඥ ලලිත් යූ ගමගේගේ නියෝගයකට අනුවයි.
ඒ අනුව විදුහල්පතිවරයා නුවරඑළිය අධ්‍යාපන කාර්යාලයට අනුයුක්ත කර ඇති බවයි වාර්තා වන්නේ.
මේ අතර, සැකකාර විදුහල්පතිවරයා ද අද අත්අඩංගුවට ගැණුනු අතර, ඔහු හැටන් මහේස්ත‍්‍රාත් අධිකරණයට ඉදිරිපත් කිරීමෙන් අනතුරුව ඇප මත මුදා හැර තිබෙනවා.
අදාළ සිසුවිය කොටගල ප‍්‍රාදේශීය රෝහලට ඇතුළත් කිරීමෙන් පසුව වැඩිදුර ප‍්‍රතිකාර සඳහා දික්ඔය මූලික රෝහලට මාරු කර යැවීමටයි පියවර ගෙන ඇත්තේ.
ගුරු උපහාර උළෙල සඳහා රුපියල් 300 ක මුදලක් එම පාසලේම ඉගෙනුම ලබන ඇයගේ බාල සොහොයුරා ගෙවා නොමැති අතර විදුහල්පතිවරයා ඒ සම්බන්ධයෙන් එම සිසුවාගෙන් ප‍්‍රශ්න කරන අවස්ථාවේ සිසුවිය එම ස්ථානයට පැමිණ ඒ පිළිබඳව විමසීමත් සමගයි විදුහල්පතිවරයා පහරදී තිබුණේ.
මේ අතර, බලංගොඩ – පින්නවල ප‍්‍රදේශයේ පාසලක 11 ශ්‍රේණියේ ඉගෙනුම ලබන සිසුවියකට එම පාසලේ විදුහල්පතිවරයා විසින් පහරදීම හේතුවෙන් ඇය ප‍්‍රතිකාර සඳහා බලංගොඩ මූලික රෝහලට ඇතුළත් කර තිබෙනවා.
