ගම්පහ – දංඕවිට නගරයේ පිහිටි මත්පැන් අලෙවිසැලක් කොල්ලකෑමට පැමිණ පොලිසිය සමඟ ඇතිවූ වෙඩි හුවමාරුවකදී තුවාල ලැබූ දෙදෙනා රක්ෂිත බන්ධනාගාර ගත කර තිබෙනවා.
මොවුන් දෙදෙනා පොලිස් ආරක්ෂාව යටතේ ශික්ෂණ රෝහලේ ප‍්‍රතිකාර ලබමින් සිටියදී වැලිසර මහේස්ත‍්‍රාත්වරයා පරීක්ෂා කිරීමෙන් අනතුරුව මේ මස 14 වනදා දක්වා රක්ෂිත බන්ධනාගාර ගත කර ඇති බවයි පොලිස් මාධ්‍ය කොට්ඨාසය සඳහන් කළේ.
එදිනට මොවුන් අත්තනගල්ල මහේස්ත‍්‍රාත් අධිකරණය වෙත ඉදිරිපත් කිරීමට නියමිතයි.
දංඕවිට නගරයේ පිහිටි මත්පැන් අලෙවිසැලක ඉබි යතුරු කඩා දේපළ සොරකම් කිරීමට කොල්ලකරුවන් දෙදෙනෙකු පැමිණ තිබුණේ ඊයේ දිනයේයි.
එහිදී පොලිසිය සමඟ වෙඩි හුවමාරුවක් සිදුවූ අතර, එම අවස්ථාවේදී බස් රථයක ගමන් කරමින් සිටි 29 හැවිරිදි තරුණියක් ජීවිතක්ෂයට පත්වුණා.
මේ අතර දිවයිනේ නමගිය සංවිධානාත්මක අපරාධ කණ්ඩායමක සාමාජිකයෙකු වූ පෙතියාගොඩ සංඛ නැමැත්තා පොලිස් විශේෂ කාර්ය බලකායේ රාජගිරිය කඳවුරේ නිලධාරීන් ඊයේ අත්අඩංගුවට ගත්තා.
මොහුගෙන් කරන ලද ප‍්‍රශ්න කිරීම්වලදී කුරුවිට ප‍්‍රදේශයේ පුද්ගලයෙකුට ගිනි අවියක් ලබාදී ඇති බවත්, එය නැවත භාරදීම සඳහා පැමිණෙන බවත් අනාවරණ වී තිබුණා.
ඒ අනුව ඇහැලියගොඩ පොලිස් වසමේ පුස්සැල්ල ප‍්‍රදේශයේදී එම අවිය ලබාගත් සැකකරු සහ තවත් අයෙකු විදේශ රටක නිෂ්පාදිත මිලිමීටර 9 වර්ගයේ පිස්තෝල අවියක් සහ පතොරම් පහක් සමඟ ත‍්‍රිරෝද රථයක්ද විශේෂ කාර්ය බලකා භාරයට ගෙන තිබෙනවා.
31 හැවිරිදි පෙතියාගොඩ සංඛ අංගොඩ ප‍්‍රදේශයේ පදිංචිකරුවෙකු වන අතර, අනෙක් දෙදෙනා අවුරුදු 25 සහ 40 යන වයස්වල පසුවන පරකඩුව ප‍්‍රදේශයේ පදිංචිකරුවන්.
