තඹුත්තේගම ප‍්‍රදේශයේ සිදුවූ රුපියල් කෝටි දෙකකට අධික මුදල් කොල්ලය දිවි පරදුවට තබා වැළැක්වූ පොලිස් සැරයන් ඞී.ඒ.සී බුද්ධික කුමාර උප පොලිස් පරීක්ෂක තනතුරට උසස් කර තිබෙනවා.
මහජන ආරක්ෂක අමාත්‍යංශයේදී ඊයේ මෙම උසස්වීම පිරිනමනු ලැබුවේ මහජන ආරක්ෂක අමාත්‍ය ටිරාන් අලස් සහ පොලිස්පති සී.ඞී.වික‍්‍රමරත්න විසින්.
එමෙන්ම, සිදුකළ ක‍්‍රියාව අගයමින් ඔහුට පොලිස් වීරතා පදක්කම සහ පොලිස් ත්‍යාග අරමුදලින් රුපියල් ලක්ෂ 25 ක මුදලක් පිරිනැමීමට ද පොලිස්පතිවරයා කටයුතු කරනු ලැබුවා.
පසුගිය මස 26 වනදා පෞද්ගලික බැංකුවක තැන්පත් කිරීම සඳහා තඹුත්තේගම ආර්ථික මධ්‍යස්ථානයේ ව්‍යාපාරිකයෙකු රැගෙන ආ රුපියල් ලක්ෂ 223 ක මුදලක් කොල්ලකා පලායාමට උත්සහ කළ යතුරුපැදියකින් පැමිණි කොල්ලකරුවන් දෙදෙනා සමඟ පොරබදා එය ව්‍යර්ථ කිරීමට මෙම පොලිස් සැරයන්වරයා කටයුතු කරනු ලැබුවා.
මේ අතර, මෙම කොල්ලය සම්බන්ධයෙන් දැනට රක්ෂිත බන්ධනාගාරගත කර සිටින රාජාංගනය ප‍්‍රාදේශීය සභාවේ ශ‍්‍රී ලංකා පොදුජන පෙරමුණු මන්ත‍්‍රී සුරංග මහේෂ් සූරියආරච්චි ඇතුළු සැකකරුවන් තිදෙනාගේ ජංගම දුරකථන සම්බන්ධ විශ්ලේෂණ වාර්තා නොපමාව පොලිසියට ලබා දෙන ලෙස අධිකරණය අදාළ දුරකථන සමාගම්වලට අද නියෝග කළා.
ඒ තඔුත්තේගම මහේස්ත‍්‍රාත් නුවන් කෞෂල්‍ය හමුවේ ඊට අදාළ නඩුව කැඳවූ අවස්ථාවේදීයි.
එමෙන්ම, සිද්ධියට අදාළව විමර්ශන මෙහෙයවා තවත් සැකකරුවන් සිටීනම් ඔවුන්ද වහාම අත්අඩංගුවට ගෙන අධිකරණයට ඉදිරිපත් කරන ලෙසයි මහේස්ත‍්‍රාත්වරයා නියෝග කළේ.
