මහ කන්නය සඳහා මෙරටට ආනයනය කළ මෙට්‍රික් ටොන් 13,000 ක පළමු යූරියා තොගය ගොඩබෑමේ කටයුතු අද ආරම්භ කෙරුණා.
ඊයේ අදාළ නෞකාව කොළඹ වරායට සේන්දු වූ අතර, දෙවන තොගය වන යූරියා මෙට්‍රික් ටොන් එක් ලක්ෂ විසි දහසක් ලබන මස අවසන් සතිය තුළ මෙරටට ලැබීමට නියමිත බවයි කෘෂිකර්ම අමාත්‍යාංශය සඳහන් කළේ.
මෙම යූරියා පොහොර මිලදී ගැනීම සඳහා ලෝක බැංකුව ඇමරිකානු ඩොලර් මිලියන 105 ක ණය මුදලක් ලබාදුන් අතර, ප‍්‍රසම්පාදන ක‍්‍රියාවලිය සඳහාද ඔවුන් මැදිහත් වුණා.
මෙලෙස ආනයනය කළ යූරියා මහ කන්නයේ වී සහ බඩඉරිඟු වගාවන් සඳහා යොදාගැනීමට නියමිත අතර, ගොවීන්ට බෙදාහැරීම් අද සිට ආරම්භ කරන බවයි කෘෂිකර්ම අමාත්‍යාංශය සඳහන් කළේ.
පළමු යූරියා තොගය ගොඩබෑමේ කටයුතු නිරීක්ෂණය සඳහා කෘෂිකර්ම අමාත්‍ය මහින්ද අමරවීර එක්වූ අතර, පොහොර මිටියක කිලෝග‍්‍රෑම් 50 ක පොහොර අඩංගුදැයි නිවැරදිව තහවුරු කරගැනීම ද අමාත්‍යවරයා එහිදී සිදුකළා.
කෙසේ වෙතත් මහ කන්නය සඳහා අවශ්‍ය මූලික පොහොර මෙතෙක් නොලැබීම හේතුවෙන් වගා කටයුතු ආරම්භ කිරීම දැනටමත් ප‍්‍රමාදවී ඇති බවට ගොවීන් චෝදනා කරනවා.
