ශ්රී ලංකාව ආසන්න පහළ වායුගෝලයේ කැළඹිලි ස්වභාවය වර්ධන වීම හේතුවෙන් දිවයින පුරා පවතින වැසි තත්වය තවදුරටත් බලාපොරොත්තු විය හැකි බව කාළගුණ විද්‍යා දෙපාර්තමේන්තුව පවසනවා.
ඒ අනුව බස්නාහිර, සබරගමුව, වයඹ , ඌව සහ උතුර පළාත්වල ඇතැම් ස්ථානවලට මිලිමීටර 100 ට වැඩි තද වැසි ඇති විය හැකි බව සඳහන්.
දිවයිනේ අනෙකුත් ප‍්‍රදේශවලට මිලිමීටර 50 ට තද වැසි ඇති විය හැකි බවයි කාලගුණ විද්‍යා දෙපාර්තමේන්තුව නිවේදනය කළේ.
මේ අතර, ඊයේ පෙරවරු 8.30 න් අවසන් වූ පැය 24 ක කාලය තුල වැඩිම වර්ෂාපතනය වන මිලිමීටර් 200 යි දශම 6 ක් ලැබී ඇත්තේ කෑගල්ල දිස්ත‍්‍රික්කයේ වේවැල්තලාව ප‍්‍රදේශයටයි.
අච්චුවේලි ප‍්‍රදේශයට මිලිමීටර් 105 යි දශම 1 ක වර්ෂාපතනයක් ලැබී තිබෙනවා.
මධ්‍යම කඳුකරයේ බටහිර බෑවුම් ප‍්‍රදේශවලට පෙරේදා රාත‍්‍රියේ සිට ඇදහැලෙනතද වැසි හේතුවෙන් ප‍්‍රධාන මාර්ගවල ඝන මීදුම් තත්ත්වයක් හටගෙන ඇති බව සඳහන්.
එබැවින් රථ වාහන ගමනාගමනයේදී සැලකිලිමත් වන ලෙසයි පොලීසිය රියදුරන්ගෙන් ඉල්ලා සිටින්නේ.
පවතින වැසි සහිත කාලගුණ තත්වයත් සමඟ ගොඩනැගිලි පර්යේෂණ සංවිධානය විසින් දිස්ත‍්‍රික්ක 08 කට බලපැවැත්වෙන පරිදි නායයාම් අනතුරු ඇඟවීමේ නිවේදනයක් නිකුත් කර තිබෙනවා.
ඒ අනුව බදුල්ල, මහනුවර , කෑගල්ල , මාතර , මොණරාගල, නුවරඑළිය සහ රත්නපුර යන දිස්ත‍්‍රික්ක සඳහා එම අවදානම් නිවේදනය නිකුත් කෙරුණා.
මේ අතර තාක්ෂණික දෝෂයක් හේතුවෙන් කුකුලේ ග`ග ජලාශයේ වාන්දොරටු 2 ක් අද පෙරවරුවේ ස්වයංක‍්‍රීයව විවෘත වී තිබුණා.
පසුව එය යථා තත්ත්වයට පත් කිරීමට කටයුතු කර තිබූ නමුත්, ජලාශය පහළ කොටසේ ජනතාවට අවධානයෙන් පසුවන ලෙසටයි වාරිමාර්ග දෙපාර්තමේන්තුව දැනුම් දෙන්නේ.
