හම්බන්තොට වරායට පැමිණි මතභේදයට තුඩු දුන් යුවාන් වැන්ග් 5 නෞකාවේ සහෝදර නෞකාවක් වන යුවාන් වැන්ග් 6 නම් චීන නිරීක්ෂණ නෞකාව ඉන්දීය සාගර කලාපයට ඇතුළු වී ඇති බව ඉන්දීය මාධ්‍ය වාර්තා කළා.
ඉන්දුනීසියාවේ – ලොම්බර්ක් සමුද්‍ර සන්ධිය හරහා එය ඉන්දීය සාගර කලාපයට ඇතුළු වී ඇති බවයි ඒවායේ දැක්වෙන්නේ.
අදාළ චීන නිරීක්ෂණ නෞකාව ඉන්දීය සාගර කලාපයට ඇතුළු වී ඇත්තේ ඉන්දියාව සිදුකළ න්‍යෂ්ටික මිසයිල අත්හදා බැලීමකට සමගාමීව බවත් එම කටයුතු නිරීක්ෂණය කිරීම එහි අරමුණ විය හැකි බවටත් ඉන්දියාව සැක පළ කරනවා.
එමෙන්ම, මෙම මාසයේ සිදුකරන චීන අභ්‍යවකාශ මධ්‍යස්ථානයේ කොටස් කක්ෂ ගත කිරිමට අදාළ වැඩසටහනකට සමගාමීව අදාළ චීන නිරීක්ෂණ නෞකාව ඉන්දීය සාගර කලාපයට ඇතුළු වී ඇති බවටත් ඇතැම් මාධ්‍ය වාර්තා පළ කර තිබෙනවා.
කෙසේ වෙතත්, නෞකාවේ ගමනාන්තය හෝ එහි මෙහෙයුම් පිළිබස කිසිදු නිල නිවේදනයක් මෙතෙක් නිකුත් වී නැහැ.
යුවාන් වැන්ග් 6 නෞකාව 2020 වසරේදී ද ඉන්දීය සාගරයට පිවිසුණු අතර එය මාස 3ක පමණ කාලයක් එම සාගර කලාපය තුළ නිරීක්ෂණ මෙහෙයුම්වල නිරත වී ඇති බවයි විදෙස් වාර්තා පෙන්වා දෙන්නේ.
