වියට්නාමයට නුදුරු මුහුදේ දී බේරාගන්නා ලද ශ‍්‍රී ලාංකිකයන් 303 දෙනාට අවශ්‍ය මානුෂීය ආධාර ලබාදීමට එක්සත් ජාතින්ගේ ජාත්‍යන්තර සංක‍්‍රමණික සංවිධානය ඉදිරිපත් වී සිටිනවා.

එම සංවිධානය නිකුත් කළ නිවේදනයක දැක්වෙන්නේ වියට්නාමයේ හැනෝයි නුවර පිහිටි ශ‍්‍රී ලංකා තානාපති කාර්යාලයෙන් කරන ලද ඉල්ලීමකට අනුව මෙම සහය ලබාදීම සිදුකරන බවයි.

ඒ අනුව ජාත්‍යන්තර සංක‍්‍රමණික සංවිධානයේ වියට්නාම කාර්යාලය විසින් ශ‍්‍රී ලංකා සහ වියට්නාම රජයන් ද සම්බන්ධ කරගෙන අදාළ සහය දීම සිදු කරනවා.

අන්තර්ජාතික නීතියට සහ ප‍්‍රමිතීන්ටත් අනුව සහ වියට්නාමයේ දේශීය නීතින්ට අනුව අවශ්‍ය සහය මෙන්ම ආරක්ෂාව සැපයීම මෙහිදී මූලිකව සිදුවනු ඇති.

ශ‍්‍රී ලාංකික සංක‍්‍රමණිකයන් 303 දෙනාට වියට්නාමය තුළ ආරක්ෂිතව රැදී සිටීමට අවශ්‍ය ස්ථානයක් සැපයීමට මෙන්ම වෙනත් මූලික සහ අත්‍යවශ්‍ය පහසුකම් සැපයීමට වියට්නාමය දක්වන උනන්දුව සම්බන්ධයෙන් ජාත්‍යන්තර සංක‍්‍රමණික සංවිධානය සිය ප‍්‍රසාදය පළකර තිබෙනවා.

මේ වන විට අදාළ සංක‍්‍රමණිකයන්ට අවශ්‍ය ආහාර හා ඖෂධ ඇතුළු මූලික අවශ්‍යතා සැපයුමට පියවර ගෙන ඇති බව එක්සත් ජාතින්ගේ ජාත්‍යන්තර සංක‍්‍රමණික සංවිධානය සඳහන් කළා.

එමෙන්ම ස්වේච්ඡාවෙන් යළි මෙරටට පැමිණීමට කැමත්තෙන් පසුවන සංක‍්‍රමණිකයන් සදහා ඊට පහසුකම් සැලසීමට ද පියවර ගන්නා බවයි එම සංවිධානය නිකුත් කළ නිවේදනයේ දැක්වුණේ.

පසුගිය නොවැම්බර් 08 වනදා වියට්නාමයට නුදුරු මුහුදේ දී මෙම සංක‍්‍රමණිකයන් 303 දෙනා බේරාගෙන තිබුණේ ඔවුන් ගමන්ගත් යාත‍්‍රාව අනතුරකට ලක්ව සිටියදීයි.