.png)
ගුවන්තොටේ රත‍්‍රං ජාවාරමට වැට බැඳෙන ලකුණු.
විදේශ ගතව සිට ජාවාරම් කිරීමේ අරමුණින් අසාමාන්‍ය ලෙස රන් ආභරණ පැළඳ මෙරටට පැමිණෙන ගුවන් මගීන්ට එරෙහිව නීතිය ක්‍රියාත්මක කිරීම සඳහා ඉදිරි සතිය තුල ගැසට් නිවේදනයක් නිකුත් කරන බව මුදල් රාජ්‍ය අමාත්‍ය රංජිත් සියඹලාපිටිය පවසනවා.
අමාත්‍යවරයා කියා සිටියේ කැරට් 22, සහ ඊට වැඩි රන් ආභරණ විශාල බර ප‍්‍රමාණයන් යටතේ පැළඳ විවිධ පිරිස් ජාවාරම් කිරීමේ අරමුණින් මෙරටට පැමිණීමේ තත්ත්වයක් ක්‍රියාත්මක බවයි.
සංවිධානාත්මකව ක්‍රියාත්මක මෙම ජාවාරමේදී කණ්ඩායම් වශයෙන් පුද්ගලයන් විදේශ ගත කර ඔවුන් ආපසු පැමිණීමේදී කැරට් 22ට වැඩි නිම කළ රත‍්‍රං ආභරණ ලෙස පැළඳ පැමිණෙන අතර ගුවන්තොටුපලේදී අදාළ රන් ආභරණ ඔවුන්ගෙන් ලබා ගැනීම ජාවාරම්කරුවන් විසින් සිදුකරනු ලබන බවයි වාර්තා වන්නේ.
මෙම ජාවාරම හරහා මසකට රජයට ඇමෙරිකානු ඩොලර් මිලියන 30 ක පමණ විදේශ විනිමයක් අහිමිවන බවට තක්සේරු කර තිබෙනවා.
මේ පිළිබඳ තොරතුරු අනාවරණ වීමෙන් පසු වහාම ඒ පිළිබඳව සොයා බලා වාර්තාවක් ලබාදෙන ලෙසයි රාජ්‍ය අමාත්‍යවරයා රේගු අධ්‍යක්ෂ ජනරාල්වරයාට නියෝග කර තිබුණේ.
ඒ අනුව, එහි වාර්තාව පසුගියදා රාජ්‍ය අමාත්‍යවරයා වෙත ලැබුණු අතර, එය අධ්‍යයනය කිරීමෙන් අනතුරුව මෙම රන් ජාවාරම වැළැක්වීම සඳහා විශේෂ තාක්ෂණික ක‍්‍රමවේදයක් යටතේ අවශ්‍ය නීතිමය පියවර ගැනීමට ක‍්‍රමවේදයක් සකස් කරන ලෙස රේගු නිලධාරින්ට උපදෙස් ලබාදී තිබෙනවා.
