ඵෙතිහාසික ශ්‍රී දළඳා මාලිගාවේ පසුගිය ඔක්තෝම්බර් මාසය සඳහා ලැබී තිබූ රුපියල් ලක්ෂ 27 ක විදුලි බිල්පත සඳහා මහජන උපයෝගීතා කොමිෂන් සභාව පොරොන්දු වූ පරිදි සහනයක් ලබාදී තිබෙනවා.
ආගමික ස්ථානවල විදුලි බිල්පත් ගාස්තු සංශෝධනය සම්බන්ධයෙන් මතු වූ කතාබහත් සමඟ මහජන උපයෝගීතා කොමිෂන් සභාවේ සභාපතිවරයා පසුගියදා මහනාහිමිවරුන් බැහැදැක ප‍්‍රකාශ කළේ ආගමික ස්ථානවලට සහනයක් ලබාදෙන බවයි. ඒ, ආගමික ස්ථාන, පූණ්‍යායතන කාණ්ඩයෙන් ඉවත් කර පොදු කාර්ය යටතට ගැනීමෙන්.
ඒ අනුව ඉහළ නැංවූ ආගමික ස්ථානවල විදුලි ගාස්තුව ඊට සාපේක්ෂව 50% කින් පමණ පහත දැමීමට තීරණය වී තිබුණා.
කෙසේ වෙතත්, පසුගිය මාසයේ ඵෙතිහාසික ශ්‍රී දළඳා මාලිගාව සඳහා රුපියල් ලක්ෂ 27 ක විදුලි බිල්පතක් ලැබී තිබූ අතර, අදාළ සහනය එම බිල්පතට ඇතුළත්ව නොතිබූ බවයි දියවඩන නිලමේ ප‍්‍රදීප් නිලංග දෑල සඳහන් කළේ.
ඒ අනුව මහජන උපයෝගීතා කොමිෂන් සභාවේ සභාපති ජනක රත්නායක සමඟ ඒ පිළිබඳව සාකච්ඡා කර අදාළ සහනය ලබාගෙන ඇති බවයි වාර්තා වන්නේ. එම සහනය හිමිවීමත් සමඟ දළඳා මාලිගාවේ පසුගිය මාසය සඳහා වන විදුලි බිල රුපියල් ලක්ෂ 13 ක් දක්වා අඩු වී ඇති අතර, එය ගෙවා දැමීමට පියවර ගත් බවයි දියවඩන නිලමේවරයා කියා සිටියේ.
මේ අතර, සංචාරක කලාපවලට අඛණ්ඩව විදුලිය ලබාදීම සඳහා වැඩසටහනක් ක්‍රියාවට නංවන බව විදුලිබල හා බලශක්ති අමාත්‍ය කංචන විජේසේකර ප‍්‍රකාශ කළා.
පසුගියදා පාර්ලිමේන්තුවේදී අදහස් දක්වමින් අමාත්‍යවරයා කියා සිටියේ අදියරෙන් අදියර එම වැඩසටහන ක්‍රියාවට නංවන බවයි.
