අනතුරක් සිදුකර වයස අවුරුදු දෙකක පමණ දැරියක මියගිය පසු එය වසං කර සැඟව සිටි පියෙකු සහ දියණියක වසර 04 කට පසු අත්අඩංගුවට ගත් පුවතක් බදුල්ලෙන් වාර්තා වනවා. බදුල්ල – මුතුමාල ගම්මානයේ පදිංචි අදාළ කුඩා දැරිය අනතුරට ලක්ව මියගොස් තිබුණේ 2018 වසරේ මැයි 11 වනදායී.

තේ දළු නෙලීමට සැකකරුවන්ගේ නිවසට තම මව සමඟ පැමිණ සිටි මෙම දරුවා අත්අඩංගුවට ගත් කාන්තාව විසින් පැදවූ තී‍්‍රරෝද රථයකට යට වී මියගොස් තිබුණා. පසුව ඇය සහ ඇයගේ පියා එක්ව දැරියගේ සිරුර මාර්ගයට ගෙනවිත් දමා ඇත්තේ දළු ප‍්‍රවාහනය කළ වෙනත් වාහනයකට යට වී දැරිය මියගිය බව පවසමින්.

අදාළ ලොරි රථයේ රියදුරු සිද්ධිය සම්බන්ධයෙන් අත්අඩංගුවට ගෙන පසුව ඇප ලබාදී තිබුණේ ලොරියක ගැටී දැරිය මියගොස් නොමැති බවට ලද අධිකරණ වෛද්‍ය වාර්තා සමඟයි. රස පරීක්ෂක වාර්තාව අනුව දක්වා ඇත්තේ අනතුර උස් වාහනයක ගැටී සිදුවී නොමැති බවයි.

ඒ අනුව අනතුර වසං කළ මෙම සිද්ධියට අදාළ විමර්ශන පසුගිය වසරේ දෙසැම්බර් මාසයේ බදුල්ල කොට්ඨාශ අපරාධ විමර්ශන අංශයට පැවරෙන අතර, ඒ අනුව සිදුකළ පරීක්ෂණ අනුවයි සැකකාර පියා සහ දියණිය පිළිබඳ කරුණු අනාවරණ වන්නේ.

ඒ අනුව දැනට අවුරුදු 78 ක් වන සැකකරු සහ 43 හැවිරිදි ඔහුගේ දියණිය බදුල්ල – මුතුමාල ගම්මානයේදීම පොලිසිය අත්අඩංගුවට ගෙන තිබෙනවා.

අධිකරණයට ඉදිරිපත් කිරීමෙන් පසු ඔවුන් රක්ෂිත බන්ධනාගාරගත කළ බවයි පොලිසිය සඳහන් කළේ.